VOV4.Xơ Đăng - Kơxê lơ 10/12, a Hà Nội, Khu xiâm tơpui kâ ƀă kong têa ê tơkŭm po kân krip Leh tơbâ 100 hơnăm hâi kot mâ pôa Nguyễn Cơ Thạch, kăn cheăng tung Khu xiâm kal kí, Kăn xiâm phŏ hnê ngăn Hô̆i đong, Ngế xiâm tơpui kâ ƀă kong têa ê hơnăm 1921 – 2021. Leh tơbâ 100 hơnăm kot mâ pôa Nguyễn Cơ Thạch cho môi tung mâu tơdroăng ki má môi tung roh hôp kal kí ki kal mê cho: Hneăng hôp tơpui kâ ƀă kong têa ê lâp plâi tơnêi, Hneăng hôp tơpui kâ roh má 31, Hneăng hôp tơdroăng kong têa ê roh má 20 vâ pêi pro tơdâng tơ’mô, tŭm têk troăng tơpui kâ ƀă kong têa ê Hneăng hôp roh má XIII dêi Đảng.

Xông tơpui a leh tơbâ, pôa Bùi Thanh Sơn, Ngế xiâm tơpui kâ ƀă kong têa ê tối rơdêi tơdroăng pêi cheăng kăch măng ƀlêi trâng dêi pôa Nguyễn Cơ Thạch hiăng ăm hên tơdroăng ki rơkê ối kơnâ ƀă tơdroăng mơnhông mơdêk tơnêi têa ƀă kơvâ tơpui kâ ƀă kong têa ê nôkố.

A Sa Ly tơplôu ƀă tơbleăng