VOV4.Xơ Đăng - Kơxo kố lơ 22/12, a pơlê xiâm Đăi tươ̆ng Võ Nguyên Giáp a kong pơlê Quảng Bình, Khu pơkuâ ngăn tíu xiâm Đảng, Kuô̆k hô̆i, Kăn xiâm hnê ngăn tơnêi têa, Chin phuh, Vi ƀan xiâm Măt trâ̆n Tơnêi têa Việt Nam ƀă kong pơlê Quảng Bình tơkŭm po kân krip leh tơbâ 110 hơnăm Hâi kot mâ Đăi tươ̆ng Võ Nguyên Giáp.

Leh tơbâ 110 hơnăm hâi kot mâ Đăi tươ̆ng Võ Nguyên Giáp

Leh tơbâ kố cho vâ pơ-ôu pơ-eăng ƀă mơnê hnoăng cheăng, veăng kum kân kĭn dêi Đăi tươ̆ng ƀă tơdroăng tơplâ tơleăng lĕm hdroâng mơngế, pro tơnêi têa tơrŭm chiâng môi, mơjiâng ƀă rak vế Tơnêi têa Việt Nam xah hô̆i chuh nghĩa; tối nhên hnoăng cheăng pơkuâ tơdrăng, rơkê plĕng dêi Đảng Kŏng san Việt Nam, kăn xiâm hnê ngăn tơnêi têa Hồ Chí Minh ƀă mâu vâi pú ki pơkuâ kăch măng hneăng hdrối kơhnâ rơkê tung tơdroăng cheăng tơplâ pro tơniăn dêi hdroâng mơngế, hơniâp lĕm, môi tuăn tơnêi têa ƀă mơjiâng rak vế Tơnêi têa. Rơ’jiu xiâm Việt Nam mơ’no tơdrêng ing um tơvi tơdroăng kố sap ing pơlê kong kơdrâm Đồng Hới, kong pơlê Quảng Bình a ƀâng VOV1.

Katarina Nga tơplôu ƀă tơbleăng