VOV4.Xơ Đăng - Kơxo lơ 12/12, châ 90 hơnăm hâi ai tơdroăng tơplâ lo mơheăm chhá dêi mâu ngế tro kroăng phâk kŏng san a hngêi phak Kon Tum pro hên ngế ‘nâi ôh tá xê a Kon Tum, a Việt Nam mê tung lâp Đông Dương, Tĭnh ŭy, Hô̆i đong kuăn pơlê, Vi ƀan kuăn pơlê, Vi ƀan Măt trâ̆n Tơnêi têa Việt Nam kong pơlê Kon Tum tơkŭm po Leh tơbâ 90 hơnăm roh tơplâ lo mơheăm chhá vâ tơbâ khôi túa kăch măng khên tơnôu dêi hdroâng mơngế; pâ mơnê tơdroăng khên tơnôu, pleăng dêi châ chăn mơheăm chhá khên tơnôu dêi mâu lêng kŏng san tung roh tơplâ xâ Pơhlăng ƀă mâu ngế ki veăng dêi khu lêng Pơhlăng a hngêi phâk Kon Tum.

Tíu leh tơbâ 90 hơnăm roh tơplâ lo mơheăm chhá a Hngêi phâk Kon Tum

Hngêi phâk Kon Tum xua khu lêng Pơhlăng mơjiâng sap mâu hơnăm 1915 – 1917, cho tíu kroăng mâu ngế phâk cheăng kal kí châ rĕng pro má môi a kơpong Tây Nguyên. Ai drêng hngêi phâk Kon Tum kroăng lối 500 ngế cheăng kal kí. Tơdroăng ki troh lâp lu dêi roh tơplâ lo mơheăm chhá ƀă ât kâ hmê a hngêi phâk Kon Tum a khế 12 hơnăm 1931 pơkâ khu lêng Pơhlăng thế pơ’lêh troăng pơkuâ kơtăng, môi tuăn tiô pơkâ dêi mâu ngế phâk cheăng kal kí pơkâ mơ’no, pơtê tơdroăng mơjiâng troăng kân kơxô̆ 14; ki rơhêng vâ tối troh hơnăm 1934 khu lêng Pơhlăng thế pơtê lôi khu pơkuâ Hngêi phâk Kon Tum, lôi pơtê tâi tâng hngêi phâk Kon Tum.

A Sa Ly tơplôu ƀă tơbleăng