VOV4.Sêdang -Tiô xêo dêi Khu xiâm pơkuâ hnê hriâm ƀă Hnê mơjiâng tuăn ngôa rơkê, xêo troh 17 chô hâi lơ 5/9, ai lối 358 rơpâu ngế hok tro pơ’lêh dêi tơdroăng pói vâ kĭ rah hriâm, châ lối 45% tung tâi tâng kơxô̆ hok tro kĭ rah mot hriâm đăi hok ƀă mâu troăng xúa điêm tơ’noăng mơgêi râ má pái phôh thong hơnăm 2021 tâk lối 3% tâng pơchông ƀă hơnăm nah. Kơxô̆ tơdroăng pói vâ kĭ mot hriâm tiô điêm ahdrối pơ’lêh cho lối 3 rơtuh 800 rơpâu, rêm ngế hok tro kĭ 4,8 tơdroăng pói vâ.

Kơxô̆ pói vâ kĭ rah xo tiô điêm vâ mot hriâm klêi kơ’nâi pơ’lêh cho lối 3 rơtuh 900 rơpâu tơdroăng pói vâ, tâk tơ’nôm lối 84 rơpâu tơdroăng pói vâ, xêo tơdâng rêm hok tro kĭ 4,9 tơdroăng pói vâ. Khu xiâm pơkuâ hnê hriâm ƀă hnê mơjiâng tuăn ngôa rơkê xuân tối ăm ‘nâi, ai lối 78 rơpâu ngế hok tro mơnhên mot hriâm ki mâu hngêi trung hiăng tơbleăng tung troăng măng Internet, tâk dâng 5 rơpâu tâng pơchông ƀă hơnăm nah.

Tiô hâi khế rah xo hok tro dêi Khu xiâm pơkuâ hnê hriâm ƀă hnê mơjiâng tuăn ngôa rơkê, sap ing hâi lơ 13/9 troh 17h hâi lơ 15/9, mâu hngêi trung pêi pro pơkâ rah roh má 1. Hdrối 17 chôu hâi lơ 16/9, mâu hngêi trung tơbleăng tơdroăng rah xo roh má 1.

A Sa Ly tơplôu ƀă tơbleăng