VOV4.Sêdang - Thăm rế hâk tơngăm dêi hnoăng cheăng kăch măng tung tơplâ pro tơleăng lĕm hdroâng mơngế, pro tơnêi têa tơrŭm chiâng môi, kuăn pơlê mâu hdroâng kuăn ngo a Tây Nguyên thăm rế loi tơngah khât tung tơdroăng pơkuâ ngăn dêi Đảng ƀă Tơnêi têa tung hneăng “tơplâ pơreăng môi tiah tơplâ xâ” dế nôkố.

*** Tung mâu hâi lâp tơnêi têa tơbâ 76 hơnăm Kăch măng Khế 8 ƀă Mơjiâng tơnêi têa lơ 2/9, tơdroăng pơreăng COVID-19 xuân tâ tú, pro ôh tá tơniăn. Phiu ro tung mâu hâi leh kân dêi tơnêi têa, la kuăn pơlê hdroâng kuăn ngo Tây Nguyên xuân mơdêk khât hiâm mơno hbrâ mơdât pơreăng. Tối ‘na tơdroăng kố, pôa Y Trớp (hdroâng kuăn ngo M’nông), a ƀon Jang Plây, cheăm Trường Xuân, tơring Dak Song, kong pơlê Dak Nông tối:

“Têt tơniăn krê dêi Tơnêi têa, hâi mơdĭng kân dêi tơnêi têa. Vâi krâ nhŏng o ngin phiu ro drêng tơnêi têa rế hía rế mơnhông tơtêk, tơdroăng rêh ối kuăn pơlê rế hía rế châ mơdêk. Laga, xua pơreăng COVID-19 tâ tú pro tơdroăng cheăng kâ rêh ối pơlê pơla tro tơdjâk. Malối cho tơdroăng rêh ối dêi vâi krâ nhŏng o mâu kong pơlê ki ai pơreăng. Vâ rak vế châ chăn tơná, rơpŏng ƀă pơlê pơla, vâi krâ nhŏng o tung pơlê xuân pêi pro kơtăng tơdroăng pơkâ 5K dêi Khu xiâm ngăn pơkeăng ƀă khăm pơlât, mơdêk hiâm mơno pôu râng hnoăng cheăng. Drêng ai ngế ki tơviah, ngế ki vêh sap ing kơpong ai pơreăng mê tơbleăng tơdrêng hlối troh kơ koan ki ai tơdjâk. Mơdêk hiâm mơno pâ nhuô̆m tơnêi têa, vâi krâ nhŏng o mơhnhôk dêi rơpó, veăng kum kơchâi, plâi pôm pơtroh ăm mâu kong pơlê Bình Dương, Đồng Nai, pơlê kong kân Hồ Chí Minh ƀă rơhêng vâ veăng hơlêm tơdroăng xơpá ƀă pơreăng rĕng kâi hbrâ mơdât, rêm ngế châ vêh ƀă tơdroăng tơniăn tiah hmâ”.

*** Vâ hbrâ mơdât pơreăng COVID-19, kong pơlê Kon Tum hiăng mơjiâng lối 2.800 tôh pêi hnoăng cheăng tung pơlê pơla. A cheăm ki malối xơpá Đăk Pxi, tơring Đăk Hà, jâ Y Dim, kăn phŏ pơkuâ ngăn Đảng ủy cheăm ăm ‘nâi:

“Pơla hdrối kố nah, Đảng ƀô̆ ƀă khu kăn pơkuâ cheăm hiăng ai rôh hôp ƀă tơbleăng ăm tâi tâng vâi krâ nhŏng o hlê ‘na ki rơ-iêo, ôh tá tơniăn dêi pơreăng COVID-19. Tiah mê, hnê mơhno ăm vâi krâ nhŏng o ‘nâ vâ pêi pro mâu troăng hơlâ hbrâ mơdât pơreăng tơƀrê. Kăn ƀô̆ hôp kuăn pơlê, thôn xing xoăng tôh trưởng lăm tối tơbleăng đi đo hnê khê̆n kuăn pơlê ‘na hnoăng cheăng hbrâ mơdât COVID-19. Ngin đi đo hnê khê̆n kuăn pơlê tâng ai tơdroăng ki ôh tá kal pôi tá lo pa gong, tâng lo athế truâ kên pâng môh rơkong, jíu kŏng ƀă kơ-ƀŏng, ƀă têa kơdê pơreăng klêi ối achê bă ngế ki ê vâ ví pơreăng tâ tú. Ngin đi đo hnê tối ăm vâi krâ nhŏng o pôi tá ối tơkŭm kơdrâm mơngế, mơdât tơdroăng ki ôu kâ nhâ̆u ƀă hên ki ê”.

*** Cheăm Dà Sar, tơring Lạc Dương, kong pơlê Lâm Đồng dế cho kơpong tơniăn, tá hâi ai ngế ki lâi tâ COVID-19, la hiâm mơno hbrâ mơdât pơreăng châ mơdêk khât. Pôa Liêng Jrang Ha Rô Ky, kăn hnê ngăn Vi ƀan hnê ngăn cheăm Dà Sar ăm ‘nâi, maluâ tơdroăng rêh ối ối trâm hên xơpá, la vâi krâ nhŏng o hiăng veăng kum mâu kế tơmeăm ki kal xúa, malối cho mâu kế tơmeăm pêi lo ing chiâk deăng môi tiah kơchâi, plâi, pôm xua tơná pêi lo vâ pơtroh kum ăm kơpong ki klâ ối krê pơlê pơla.

“Pêi pro tơdroăng hnê mơhno dêi kong pơlê Lâm Đồng xuân môi tiah tơring Lạc Dương ‘na hnoăng cheăng hbrâ mơdât pơreăng, kăn ƀô̆ kuăn pơlê mâu hdroâng kuăn ngo cheăm Dà Sar ngin môi hiâm mơno pêi pro kơtăng mâu troăng hơlâ, hbrâ mơdât pơreăng xuân môi tiah tơdroăng ki klâ kơtăn pơlê pơla. Tung to lâi măng tĭng vêh ngi kố, ngin hiăng mơjiâng tíu gak kring, rak vế kơpong ki tá hâi ai pơreăng séa ngăn mâu ngế ki tơviah mot tung tơring vâ hbrâ mơdât pơreăng.

Pakĭng veăng gak a mâu tíu gak, vâi krâ nhŏng o a cheăm ngin ngăn tung tơdroăng ki tơniăn dêi rơpŏng hngêi ai phái kum phái, ai kơchâi kum kơchâi veăng rơtế tŏng kum pơtroh ăm mâu kơpong ki ai pơreăng dế pêi pro klâ ối krê pơlê pơla tiô pơkâ 16 dêi Ngế pro xiâm hnê ngăn Chin phuh”.

*** Loi tơngah tung tơdroăng pơkâ dêi Đảng ƀă Tơnêi têa tung hbrâ mơdât pơreăng COVID-19 ƀă hiâm mơno “Hbrâ mơdât pơreăng môi tiah tơtrâ xâ”, jâ Rmah Chứt, hdroâng kuăn ngo Bơhnéa a ƀuôn Thong A, cheăm Ia Hrú, tơring Čư̆ Pưh, kong pơlê Gia Lai tối:

“Drêng pơreăng tâ tú, vâi krâ nhŏng o pêi pro tro vâ hbrâ mơdât pơreăng, vâi krâ nhŏng o pêi pro kơtăng 5K. Khu kăn pơkuâ cheăm, thôn xuân đi đo hnê khĕn vâi krâ nhŏng o tung hbrâ mơdât pơreăng. Vâi krâ nhŏng o rơhêng vâ pơreăng rĕng hía, vâi krâ nhŏng o châ mơnhông mơdêk cheăng kâ tiah hmâ. Á rơhêng vâ tá hdroâng kuăn ngo rơtế môi hiâm mơno vâ pơreăng kân rĕng châ tơkâ luâ. Rơkâu ăm vâi krâ nhŏng o pin dế ối a kơpong ki ai pơreăng rak vế ivá tơniăn lĕm”.

A Sa Ly - Katarina Nga tơplôu ƀă tơbleăng