VOV4.Sêdang - Pơtối tơdroăng pêi cheăng a hneăng hôp má 2, Kuô̆k hô̆i hneăng má XV, kơxo lơ 29/10, Kuô̆k hô̆i tơpui tơno mơ’no tơdrêng tung um tiô troăng măng internet ‘na Tơdroăng tơkêa bro Luât tê mơdró ƀaoh hiêm (‘mâi rơnêu). Mâu kăn teăng mâ tối, luât ‘mâi rơnêu tơdâng tơ’mô pơxúa pơla peăng ki tê ƀă peăng ki xúa ƀaoh hiêm; tơniăn tơdâng tơ’mô, tơdrăng lĕm. Tiô mâu kăn teăng mâ, pơkâ xiâm dêi tơdroăng rôe ƀaoh hiêm cho vâ chêl a mâu tơdroăng ki tro lŭp, pro ăm tơniăn tơdroăng ki pro ôh tá tơniăn.

Xua mê, pakĭng tơdroăng rak vế ki pơxúa ƀă tơdroăng ki ôh tá tơniăn ƀă khu tê mơdró ƀaoh hiêm, Mơ-éa tơkêa bro Luât tê mơdró ƀaoh hiêm kal thế tơtrŏng tro kơlo ƀă mơngế ki lăm rôe, mơngế ki châ pơxúa ƀaoh hiêm ƀă hía hé. Mâu kăn teăng mâ Kuô̆k hô̆i xuân pơkâ thế Chin phuh pơtối séa ngăn, tơxâng tiô tơdroăng kal vâ dêi tíu tê mơdró ƀaoh hiêm, tá ƀaoh hiêm hơnăm kuăn mơngế ƀă ƀaoh hiêm oh tá xê ƀaoh hiêm hơnăm kuăn mơngế, ƀaoh hiêm ƀă vêh ƀaoh hiêm.

Xuân tung hâi ki mê, Kuô̆k hô̆i tơpui a tôh ‘na: Tơdroăng tối hdrối pơkâ vêh mơnhông cheăng kâ hneăng hơnăm 2021 – 2025; Tiô tối hdrối pơkâ xúa tơnêi tơnêi têa rơxông hơnăm 2021 – 2030, tơmiât pêi troh hơnăm 2050 ƀă pơkâ pêi xúa tơnêi 5 hơnăm (2021 - 2025).

A Sa Ly tơplôu ƀă tơbleăng