VOV4.Xơ Đăng - Tơkŭm pơtâng tối ing mơhnhôk, tơdroăng ‘’Tâi tâng kuăn pơlê veăng hbrâ, mơdât pơreăng COVID-19 ƀă hbrâ mơdât mot lo ôh tá tro luât’’ vâ mơdêk tơdroăng hlê plĕng, mơnhên hnoăng dêi rêm ngế krê drêng ai tơdjâk dêi pơreăng COVID-19, khu mô đô̆i gak tơkăng kong hiăng mơhnhôk ivá tâi tâng kuăn pơlê veăng hbrâ, mơdât pơreăng ƀă hbrâ mơdât mot lo ôh tá tro luât; kum mơdât ôh tá ăm pơreăng xông tâ tú ing pa kong tung tơnêi têa ƀă tung pơlê pơla.

Ing mê, tơdroăng pêi pro ƀă hên tơdroăng ki pơxúa, tơtro ƀă tơdroăng tung tung pơlê cheăm, rơtế ƀă tơdroăng mơhnhôk pêi pro a kong pơlê, tơniăn mâu pơkâ ‘na tơdroăng hbrâ mơdât pơreăng COVID-19. Hnê tối vâ rêm ngế kuăn pơlê hlê plĕng tro, tŭm ‘na tơdroăng ki rơ-iô dêi pơreăng COVID-19; tơkŭm pêi mâu tơdroăng rêh ối pơlê pơla, rơtế ƀă kuăn pơlê ki kơtiê xơpá tơdjâk pơreăng COVID-19.

Cho kong pơlê ki ai tíu tơkăng kong xŏn lối 468 km tơkoh ƀă kong têa Lếo, ai hên troăng kŭn cho troăng kong, tơdroăng séa ngăn tíu tơkăng kong, mơdât mâu ki mot lo hmâng vâ hiăng châ Mô đô̆i gak tơkăng kong Nghệ An pêi tơdrêng, lâp lu ƀă tơ-ƀrê.  Tung mê, tơmâng khât tơdroăng hnê tối troh kuăn pơlê kơpong tơkăng kong. Đăi tă Dương Hồng Hải, Kăn phŏ pơkuâ Mô đô̆i gak tơkăng kong dêi kong pơlê Nghệ An tối ăm ‘nâi:

“Ngin pêi tro tơdroăng hnê tối tơrêm ngế kuăn pơlê a kơpong tơkăng kong, ví mâu tơdroăng pêi ki veăng mơhno djâ mâu ngế mot ôh tá tro luât ing kong têa Lếo; Tơkŭm mâu kơthô chêh tơtrâ mâu ki xôi a mâu pơlê cheăm drô troăng tơkăng kong, ngin pơcháu ăm Kăn phŏ hnê ngăn Đảng ủy cho kăn ƀô̆ gak tơkăng kong mơdêk hnoăng cheăng pêi ki xiâm tung hnê tối mơhnhôk kuăn pơlê veăng tơtrâ châ ‘nâi mâu ngế ki ing kong têa ê kơtâu mot a tơnêi têa pin ƀă ôh tá tơniăn ‘na mâu hlá mơ-éa tiô pơkâ’’.

Rơtế ƀă Mố đô̆i gak tíu tơkăng kong, hên kuăn pơlê mâu cheăm tơkăng kong xuân mơdêk hlê plĕng tung tơdroăng hbrâ mơdât COVID-19 môi tiah truâ kên pâng rơkong môh a tíu ai krâm mơngế, mơgrúa krúa, xôh pơkeăng rơtâ tá tíu ối. Malối cho “tuăn mâ’’ dêi Mô đô̆i gak tơkăng kong drêng hbrâ tăng ‘nâi mâu tơdroăng, tơbleăng  teăm tơdrêng châ ‘nâi mâu ngế mot hmâng vâ tung pơlê cheăm.

Hlo pơreăng rế tâ tú rơ-iô COVID-19, Mô đô̆i gak tơkăng kong dêi kong pơlê Quảng Bình hiăng mơjiâng pro 14 tíu gak ngăn drô troăng kŭn troăng kong, hơlâ prôk drô troăng tơkăng kong ƀă kong têa Lếo vâ mơdât mâu ngế ki lo ing kơpong tâ tú pơreăng mot a tơnêi têa pin.

Thiê̆u tăng Lê Ngọc Gia, Chí trị viên đông tơkăng kong Làng Ho, Mô đô̆i găk tơkăng kong dêi kong pơlê Quảng Bình tối ăm ‘nâi, tung pơla dế trâm xơpá, mô đô̆i châ kuăn pơlê tíu tơkăng kong veăng kum:

   “Ngin mơnê khât, mơhé drô troăng tơkăng kong xua đông mố đô̆i pơkuâ, tơdroăng rêh ối dêi kuăn pơlê trâm hên xơpá la kuăn pơlê hiăng veăng tơlo tơmeăm, veăng môi tuăn ƀă mô đô̆i. Tung la ngiâ ngin kô mơ-eăm pê klêi mâu tơdroăng hbrâ mơdât pơreăng COVID-19”.

Ƀă troăng rơhlâ “Hbrâ mơdât pơreăng môi tiah plâ xâ”, mâu mô đô̆i gak tơkăng kong dêi kong pơlê Quảng Bình pơ’lêh dêi rơpó gak plâ hâi măng a mâu tíu gak ngăn drô troăng kong, hơlâ troăng vâ mot tung kong têa Lếo. Mâu lêng mố đô̆i ôh tá xâu pá puât, kâ, koi ối pơtê a kong, pơtê a mâu ning nong. Jâ hồ Thủy, ngế kuăn ngo Vân Kiều a pơlê  Eo Bù - Chút Mút, cheăm Lâm Thủy, tơring Lệ Thủy, kong pơlê Quảng Bình rơrêk tung hiâm mơno tối, hlo mô đô̆i pro hơpăm a tơdế kong kân tíu tơkăng kong trâm hên xơpá mê kuăn pơlê veăng kum, mơhnhôk mâu ngế veăng kum mâu mô  đô̆i pê klêi hnoăng cheăng:

“Tâng hlo mâu ngế tơviah prôk luâ tơkăng kong mê ngin kô tơbleăng ăm mô đô̆i gak tơkăng kong vâ mâu vâi ngoh tí tăng ‘nâi mâu tơdroăng nếo ai, mơdât teăm tơdrêng. Tơdrêng ƀă mô đô̆i gak tơkăng kong hbrâ mơdât pơreăng COVID-19 ôh tá ăm mot a thôn pơlê tơná”.

Tôh tơdah xo mâu kuăn pơlê ki mot lo a tíu tê mơdró tơkăng kong Cha Lo, kong pơlê Quảng Bình ăm ‘nâi, vâ séa ngăn nhên mâu ngế ki prôk tơkâ luâ mâu kơpong tơkăng kong. Khu xiâm pơkuâ ngăn Mô đô̆i gak tơkăng kong dêi kong pơlê Quảng Bình hiăng mơjiâng 14 tíu gak ngăn a troăng kŭn troăng kong, hơlâ mot lo ƀă kong têa Lếo. Đăi tă Trịnh Thanh Bình, Ngế pơkuâ xiâm Mố đô̆i gak tơkăng kong dêi kong pơlê Quảng Bình ăm ‘nâi, tơdrêng ƀă tơdroăng lăm séa ngăn, Mố đô̆i gak tơkăng kong Quảng Bình đi đo mơhnhôk kuăn pơlê ki ối a tíu tơkăng kong tơtế ƀă mố đô̆i veăng plâ mơdât pơreăng COVID-19:

“Mâu tôh gak ngăn a tíu tơkăng kong pêi cheăng kơtăng, ngăn nhên mơngế prôk tơkâ luâ hlối séa ngăn drô troăng tơkăng kong. Rơtế amê tơrŭm tơdroăng hnê mơhnhôk kuăn pơlê mơdêk hlê plĕng ‘na tơdroăng hbrâ mơdât pơreăng, hlối ăm kên pâng môh rơkong ƀă mơgrúa krúa lĕm thôn pơlê’’.

Tung  pơla ai hên kuăn pơlê a tíu tơkăng kong rơtế veăng ƀă mâu mố đô̆i kring gak tơkăng kong vâ hơniâp lĕm, veăng plâ mơdât pơreăng COVID-19, mê xuân ai mâu ngế tuăn ‘mêi hriĕn xua hnoăng tơná pơkuâ ƀă hnoăng cheăng pêi tơná vâ  kum mâu ki ‘mêi. Mơni pin ối chôu pâ achê kố, troăng ki djâ 200 ngế mot hmâng vâ tơkâ luâ tíu tơkăng kong Bản Lầu (tơring Mường Khương, kong pơlê Lào Cai) tro ‘nhiê, ai hên tơdroăng ki vâi pro pơkí kơtôa dêi mâu ngế ki ‘mêi hiăng châ mơnhên. Ki vâ tối, mâu ki ối pá rŏng cho ngế ki gak ngăn a tíu tơkăng kong kum mâu ki ‘mêi hên hdrôh ăm vâi tơkâ luâ, mê cho Thôn đô̆i trương-ngế ki veăng kum séa ngăn mơdât pơreăng COVID-19 rơtế ƀă mâu lêng mố đô̆i gak tơkăng kong.

Xua mê, tối nhên tiah kố, tâng rêm ngế kuăn pơlê ôh tá hlê tro, oh tá hlê tŭm mâu tơdroăng, kơlo ki rơ-iô dêi pơreăng COVID-19 ƀă tơná ƀă kuăn pơlê, mê mơhé vâ khu Mô đô̆i gak tơkăng kong ai rơpâu to tuăn, rơpâu to mâ, kô ai hrĭng rơpâu mâu ngế ki gak ngăn a mâu troăng kong a hơlâ ki mot lo, mê xuân ôh tá kâi mơdât hlối tơdroăng hriăn pêi pro dêi mâu ngế ki ‘mêi, ki ai troăng, ai khu tơkŭm djâ mâu ngế mot lo hmâng vâ.

VOV4 chêh

Gương tơplôu ƀă tơbleăng