VOV4.Xơ Đăng - Pơlât, mơdêk ivá mo lĕm ăm mâu ngế ki klêi kơ’nâi Mơheăm ôh tá châ kơtâu tiu troăng veăn troh a ngôa cho tơdroăng kal khât, veăng pro ăm ngế ki mê ai ivá vêh mo lĕm, ôh tá tro chó, rĕng châ vêh lĕm rêh ối môi tiah hmâ. Tâng lôi ôh tá vâ rĕng tơmâng “hâi chôu ki kal mê ’’, ôh tá rĕng pơlât kô pro ăm ngế ki mê chiâng ai tơdroăng châi ó. Ƀok thái pơkeăng chuyên khoa môi, Lương Công Toàn, Ngế xiâm pơkuâ khoa Phục hồi chứng năng, Hngêi pơkeăng Y học cổ truyền kong pơlê kô hnê tối tơdroăng mê ing tơdroăng kơ êng a kơ’nâi kố:

-Ô ƀok thái pơkeăng, mê ƀok thái pơkeăng ăm ‘nâi ki kal dêi tơdroăng pơlât ăm ivá rĕng vêh mo lĕm ăm ngế ki klêi kơ’nâi Mơheăm oh tá châ kơtâu tiu troăng veăn troh a ngôa?

Ƀok thái pơkeăng Lương Công Toàn: Pin ‘nâi tiah kố, ngế ki Mơheăm ôh tá châ kơtâu tiu troăng veăn troh a ngôa cho mâu ngế ai tíu tro rong tung troăng mơheăm ngôa. Pơla rôh ki apoăng, ngế ki mê kô hâk vâ pơlât ƀă pơkeăng ôu pơkeăng pŭm vâ ăm dêi ivá mo lĕm. Ngế ki Mơheăm pôh tá châ kơtâu tiu troăng veăn troh a ngôa hlối pro châ khăng môi pâ, lơ khăng kŏng ƀă chêng môi pâ ki mê gá hmâ pro chiâng râ ó.

Ngế ki tro mê ôh tá chiâng prôk lăm, ‘nâ hía chiâng prôk la ôh tá chiâng prôk têi lơ ngế ki mê ôh tá chiâng tơpui, tuăn rế ôh tá chôu pâ, ‘mêi tung tuăn ngôa. Tâi tâng mâu tơdroăng ki mê pro chiâng ai tơdroăng châi klêi kơ’nâi Mơheăm oh tá châ kơtâu tiu troăng veăn troh a ngôa ki râ ó tâng ngế ki mê bú pơlât nội khoa, pơlât tơdrêng mê pin thế hriăn pơlât tơdroăng ki vâ rêh ối mê hdrối, klêi mê ngế ki châi mê ôh tá pơtối pơtâp ivá, pơtâp ăm ivá vêh mo lĕm lơ pơlât mâu tơdroăng châi ki tâ u ối tung châ mê ah ngế ki châ mê kô chiâng chó troh ta hlâ.

Xua mê, khŏm thế ngế ki châi mê klêi pơlât nội khoa tơniăn mê thế pơlât mơdêk ivá vêh mo lĕm tơrŭm ƀă tơdroăng pơlât tiô y hok cổ truyền’’.

-Tiah mê, ô ƀok thái pơkeăng tíu ki lâi klêi Mơheăm oh tá châ kơtâu tiu troăng veăn troh a ngôa chiâng pơtâp ivá ăm vêh mo lĕm ki tơtro  tơ-ƀrê tâ?

Ƀok thái pơkeăng Lương Công Toàn: Khoa hok mơnhên tiah kố, ngế ki tro Mơheăm oh tá châ kơtâu tiu troăng veăn troh a ngôa thế rĕng pơtâp ivá rế rĕng rế tro. Kô chiâng pơtâp tung pơla pơlât tơdrêng, veăng ICU ngế ki mê xuân chiâng pơtâp, bú ai môi tơdroăng tê oh tá chiâng pro rôh apoăng, klêi mê tiah tơniăn, ƀok thái pơkeăng nội khoa ăm phêp xuân chiâng pơtâp ivá. Ngế ki mê thế pơtâp mâu tơdroăng pơtâp ki u ối tiô kơ rôh. Rôh má môi drêng tro mơheăm ôh tá châ kơtâu tiô troăng veăn, kô chiâng pơtâp tơdro dêi mâu kóu kơxêng chêng kŏng, pơtâp tiê bliê ngế ki tro mê.

Tâng tơniăn tâ nếo pin pơtối pơtâp ăm vêh mo lĕm ivá ngăn tiô kô kơlo ki râ lơ ôh, ing pơtâp iâ troh pơtâp hên ôh tá chiâng tơkôm la lâi hiăng tâi mơheăm ôh tá troh a ngôa mê nếo pơtâp. Ki kal má môi pin thế kơhnâ pơtâp ivá rêm hâi tung pơla 6 khế apoăng.

Ngế mơheăm oh tá châ kơtâu tiu troăng veăn mê kơ’nâi pro chiâng ai tơdroăng châi, tâng tung 6 khế apoăng ôh tá mơ-eăm pơlât mê kơ’nâi 6 khế hiăng pro chiâng ai tơdroăng châi troh ta ah drêng mê pin pơlât oh tá hlo klâi xếo, tâng châ tơbrê bú pro ăm chiâng prôk klêng tê tê, bú chiâng tơdro, tâng ôh mâu tơdroăng ki ê pá vâ châ vêh lê̆m  hlối  kal thế rĕng pơtâp ăm vêh mo lĕm.

-Ô ƀok thái pơkeăng, tung pơla hdrối nah, ki tơbrê tung pơtâp vêh lĕm ivá ăm mâu ngế ki klêi kơ ‘nâi mơheăm ôh tá kơtâu tiu troăng veăn troh a ngôa a Hngêi pơkeăng Y học cổ truyền mê  môi tiah lâi?

Ƀok thái pơkeăng Lương Công Toàn: Hngêi pơkeăng Y học cổ truyền  cho tíu pơlât râ kong pơlê hmâ pơlât mâu ngế ki mơheăm ôh tá kơtâu tiu troăng veăn troh a ngôa, mê kơxô̆ mơngế pơlât a mâu râ ki ê pơtroh troh akố krâm ‘nâng. Rêm hâi Khoa Phục hồi chức năng, cho kơvâ ki pơlât ăm vêh mo lĕm châ dêi Hngêi pơkeăng Y học cổ truyền kong pơlê pơtâp ăm mâu ki ai tơdroăng châi klêi mơheăm oh tá kơtâu tiô troăng veăng pơlât ăm dâng 100-150 ngế.

Ngăn tiô kơ tơdroăng châi râ lơ ôh, tíu ki tro ro râ mê ki tơ-ƀrê tơdroăng pơlât pơrá phá dêi pó há.  Laga, Hngêi pơkeăng kô tối, tâi tâng mâu ngế ki ai tơdroăng châi mơheăm oh tá kơtâu tro tiô troăng veăn troh a ngôa klêi pơlât a Hngêi pơkeăng Y học cổ truyền kong pơlê ai dâng 70-80% ngế klêi pơlât hiăng chiâng prôk lĕm nếo. Dâng 2-30% thế pơlât ton hơnăm, vâ tối klêi pơlât hên ngế chiâng prôk lĕm nếo’’.

-Mơnê kơ ƀok thái pơkeăng hiăng hnê tối!

Mỹ Hạnh- Đình Thi chêh

Gương tơplôu ƀă tơbleăng