VOV4.Sêdang - Tung pơla pơtê leh Hâi mơjiâng tơnêi têa lơ 2/9 ton ai 4 hâi, pro tơ’lêi ăm tơdroăng ki pơreăng xông tâ tú, hlê plĕng sap ing mâu hâi pơtê lơ 30/4 kố nah, Ngế pro xiâm hnê ngăn Chin phuh hiăng ai hlá mơ-éa pơtroh pơkâ thế kăn hnê ngăn Vi ƀan mâu kong pơlê, pơlê kong kân ối tung tơnêi têa mơdêk hiâm mơno pôu râng dêi hnoăng cheăng ƀă mâu tơdroăng ki rơhêng vâ tâi tâng ivá, châ chăn dêi kuăn pơlê; pơtối tơkŭm pơkuâ, hnê mơhno ƀă mơdêk tơkŭm pêi pro kơtăng, tơƀrê mâu troăng hơlâ hbrâ mơdât pơreăng a kong pơlê.

Malối, ƀă mâu kong pơlê ki dế tung pơla pêi pro klâ ối krê pơlê pơla, athế mơdêk pêi pro kơtăng tơdroăng ki klâ ối krê pơlê pơla tiô hiâm mơno “kơbố ki lâi ối ulâi, athế ối amê”; pôi tá ăm ai tơdroăng ki ối tơkŭm hên mơngế, pôi tá ămai tơdroăng kuăn pơlê lăm prôk ukố umê, lopa gong tung pơla hâi lơ 2/9; pơxâu phâk kơtăng tiô luât mâu ngế ki pro xôi ‘na hbrâ mơdât pơreăng.

Khu tơrŭm pêi pro tro hnoăng cheăng rak tơniăn ‘na tơdroăng rêh ối, gâk kring tơniăn tung pơlê pơla vâ kuăn pơlê hmiân tuăn tŏng kum hnoăng cheăng hbrâ mơdât pơreăng. Mơ-eăm tŏng kum rêh ối pơlê pơla, rak tơniăn ‘na khăm pơlât sap ing hơngế, sap ing tíu pêi cheăng tung pơla pơtê leh ƀă pêi pro séa ngăn pơlê pơla.

Katarina Nga tơplôu ƀă tơbleăng