VOV4.Xơ Đăng - Kơxê lơ 8/12 a Hà Nội, Tíu xiâm Khu ngăn kuăn pơlê pêi chiâk deăng Việt Nam tơrŭm ƀă Khu ngăn chiâk deăng ƀă Mơnhông thôn pơlê tơkŭm po rôh hôp 'no tơdrêng ing troăng hyôh internet kĭ tơkêa “Tơdroăng tơrŭm mơdêk hnê tối, mơjiâng thôn pơlê nếo tơtro ƀă tơdroăng hơ’lêh pơkâ kơvâ pêi chiâk deăng hneăng hơnăm 2021 -2025”. Tơpui a leh kĭ tơkêa, pôa Lương Quốc Đoàn, kăn hnê ngăn Tíu xiâm Khu pêi chiâk deăng Việt Nam tối nhên, tung tơrŭm cheăng pơla pêi chiâk deăng – kuăn pơlê pêi chiâk deăng – thôn pơlê mê kuăn pơlê cho tíu ki tơrŭm, cho tíu xiâm, thôn pơlê cho tơdroăng mơ-eăm, pêi chiâk deăng cho ivá.

Kăn xiâm ngăn chiâk deăng ƀă Mơnhông thôn pơlê Lê Minh Hoàng rơhêng vâ, athế hlê nhên tơdroăng ki rơhêng vâ ƀă túa tơmiât dêi kuăn pơlê pêi chiâk deăng, mâu tơdroăng tơkŭm ƀă tíu xiâm dêi rêm tơdroăng mơjiâng tơdroăng cheăng kâ rêh ối pơlê pơla; pro tiah lâi vâ kuăn pơlê ai tŭm ivá vâ mơ-eăm xêh pro kro mơdrŏng tung pơla pêi chiâk deăng hơ’lêh sap ing pêt mơjiâng tiah hmâ chiâng pêt mơjiâng rơkê plĕng, tơdroăng kố athế châ tá  mâu kăn ƀô̆ pêi chiâk deăng ƀă mâu kuăn pơlê a kong pơlê rơtế tơrŭm pêi pro.

Katarina Nga tơplôu ƀă tơbleăng