VOV4.Xơ Đăng - Hâi lơ (24/11), a Hà Nội ƀă Moskwa po hneăng hôp mơ’no tơdrêng tiô troăng hyôh internet roh má 6 dêi Tôh pêi cheăng Việt Nam - Rusi. Hneăng hôp xua pôa Nguyễn Văn Hồi - ngế xiâm phŏ ngăn cheăng pêi Mô đô̆i tro rong ƀă rêh ối pơlê pơla Việt Nam ƀă Thiê̆u tươ̆ng Dimitriy Pavlovich Demidenko - Ngế xiâm ngăn kăn sát, kong têa Rusi pơkuâ, veăng hôp mê ai kăn teăng mâ mâu Khu xiâm, kơvâ cheăng ki tơdjâk péa pâ.

A hneăng hôp, péa pâ hiăng khĕn kơdeăn khât luât pơkâ hôp tiô hneăng ƀă pơ’lêh dêi rơpó tơdroăng cheăng dêi Tôh pêi cheăng, hlối tối tơdroăng pơtối po hneăng hôp tơ-ƀrê luât pơkâ mê hiăng pro chiâng môi khu tơrŭm cheăng, tơpui tối ăm dêi rơpó ‘nâi mâu tơdroăng châ tơ-ƀrê ƀă teăm tơdrêng pơla péa kơ koan ki rak ngăn mơngế pêi cheăng a péa kong têa dêi rơpó môi tiah mâu kơ koan ki tơdjâk ‘na rak ngăn mơngế mot rêh ối.

Ing mê, rơtế ƀă dêi rơpó tăng troăng rơhlâ, mơdêk tơrŭm pêi cheăng ƀă rơtế tah ki xơpá nếo ai tung tơrŭm cheăng. Péa pâ xuân po ngăn vâ tí tăng ‘nâi tơdroăng chêh tơhrâ tơ’mot ƀă tăng mâu ngế pêi cheăng ki ai khu djâ cho mơngế Việt Nam ki lăm pêi cheăng ai pơkâ tiô khế hơnăm pêi cheăng a kong têa Rusi.

Gương tơplôu ƀă tơbleăng