VOV4.Sêdang - A hneăng tơ’noăng khu lêng lâp plâi tơnêi Army Games 2021, Khu râ kăn pơkuâ mô đô̆i kuăn pơlê Việt Nam ối má 7/42 tơnêi têa ƀă kơpong tơnêi tíu veăng hneăng tơ’noăng. Mê cho tơdroăng a Leh mơgêi Hneăng tơ’noăng ‘na khu lêng lâp plâi tơnêi roh má 7 (Arny Games 2021) hiăng châ tơkŭm po kân krip a Moskwa, kong têa Rusi. Klêi kơ’nâi hên hâi tơ’noăng, Khu mô đô̆i kuăn pơlê Việt Nam veăng Army Games 2021 a kong têa ê hiăng pêi kêi đeăng tơtro rêm hnoăng cheăng châ pơcháu, châ kâ hên má môi hluâ 4 hneăng veăng tơ’noăng khu lêng lâp plâi tơnêi.

Ki hên mâu môn ki veăng tơ’noăng pơrá châ kâ hên lơ ƀă hơnăm nah mơhé kơxô̆ khu mô đô̆i dêi mâu kong têa veăng tơ’noăng hên tâ ƀă tơdroăng môn tơ’noăng xuâ pá tâ. Mâu ngế ki hnê ngăn tơ’noăng a Army Games 2021 tối mâu khu mô đô̆i kuăn pơlê Việt Nam châ hnê mơhno tơtro, chiâng rơkê tung mâu môn tơ’noăng. Army Games cho roh mâu khu mô đô̆i Việt Nam hriâm, xo vế túa ki rơkê tơtro tung hbrâ rơnáu tơplâ, ki má lối cho tơdroăng châ achê, chiâng xúa ƀă pơkuâ mâu pháu hnêa, kơmăi kơmok rơxông nếo.

A Sa Ly tơplôu ƀă tơbleăng