VOV4.Sêdang - Kơxê lơ 28/10/2021, pôa Phạm Minh Chính, Ngế pro xiâm hnê ngăn Chin phuh hiăng rơtế mâu khu râ kăn pơkuâ ASEAN, veăng Leh mơgêi Hneăng hôp khu râ kăn xiâm ASEAN roh má 38 ƀă 39 ƀă mâu Hneăng hôp Khu râ kăn xiâm ki tơdjâk ƀă leh pơcháu hnoăng cheăng Kăn xiâm hnê ngăn ASEAN hơnăm 2022 ăm kong têa Kul. Xông tơpui mơgêi ƀă hnoăng cheăng Kăn xiâm hnê ngăn ASEAN hơnăm 2021, Pơtáu kong têa Brunei mơnhên mơhé trâm pá xua pơreăng COVID-19 xông tâ tú, ASEAN pơtối mơnhông ó rơdêi.

Tơmiât pêi la ngiâ, pơtáu kong têa Brunei pơkâ thế kal pơtối thăm pêi pro mâu tơdroăng mơ-eăm mơjiâng pơlê pơla ASEAN ing tơdroăng thăm pêi pro chuh ngiah hên troăng ƀă mơjiâng khu cheăng ó rơdêi a kơpong. Tơdah hnoăng cheăng Kăn xiâm hnê ngăn ASEAN hơnăm 2022, Ngế pro xiâm hnê ngăn kong têa Kul tơbleăng tơdroăng pơxá pêi hơnăm Kăn xiâm hnê ngăn ASEAN 2022 cho “ASEAN pêi pro rơtế hbrâ mâu pơloăng mơnúa” xua tơrŭm môi tuăn, hơniâp ƀă mơnhông mơdêk kro mơdrŏng a kơpong, thăm mơjiâng môi pơlê pơla tơdâng tơ’mô, ó rơdêi ƀă tâi tâng, tơtro ƀă tơdroăng ki pêi xiâm dêi ASEAN rơtế pó thăm pêi pro la ngiâ, môi khôi túa lĕm, môi pơlê pơla.

A Sa Ly tơplôu ƀă tơbleăng