VOV4.XơĐăng - Klêi kơ’nâi 3 hâi pêi cheăng, kơxê lơ 29/12, Hneăng hôp Kŏng an lâp tơnêi têa roh má 77 hiăng mơgêi. Xông tơpui mơgêi Hneăng hôp, pôa Tô Lâm, Ngế xiâm pơkuâ Kŏng an pơchân tối Kŏng an mâu kơ koan cheăng, kong pơlê thế pơtối pơ’lêh nếo, mơnhên hnoăng cheăng inhên rêm kơ koan cheăng, rêm ngế kăn ƀô̆, mâu lêng tung tơdroăng pơtâng tối kuăn pơlê ƀă mơjiâng tơdroăng Tâi tâng kuăn pơlê gâk kring Tơnêi têa; thăm tơpui kâ ƀă kong têa ê, tơrŭm lâp plâi tơnêi; Mơdêk tâ mê nếo tơdroăng ki dâi lĕm, châ tơƀrê mâu tơdroăng cheăng.

Pôa Tô Lâm, Ngế xiâm pơkuâ Kŏng an xông tơpui mơgêi hneăng hôp

Pôa Tô Lâm pơkâ thế Kŏng an mâu kơ koan cheăng, kong pơlê kal séa ngăn tơdroăng, pêi pro kơtăng mâu Pơkâ thế, Luât pơkâ hnê mơhno dêi Khu pơkuâ hnê ngăn cheăng Đảng, Chin phuh, Ngế pro xiâm hnê ngăn Chin phuh, Khu hnê mơhno tơnêi têa hbrâ, mơdât pơreăng COVID-19. Mâu tíu cheăng thế hnê mơhno kơtăng tơdroăng tơplâ mơdât mâu ngế xôi, gâk kring tơniăn Têt Lo hơnăm nếo Nhâm Dần.

A Sa Ly tơplôu ƀă tơbleăng