VOV4.Xơ Đăng - Klêi kơ’nâi 2 hâi tơkŭm po, kơxê lơ 26/11, a Hà Nội, Hneăng hôp tơpui tơno mơngế rơkê hơnăm ối nếo Việt Nam lâp plâi tơnêi roh má 4 hiăng mơgêi. A hneăng hôp tơpui tơno, mâu ngế rơkê hơnăm ối nếo hiăng rơtế tơpui tơno, pơkâ mơ’no mâu tơdroăng pơkâ pêi, troăng hơlâ mơnhông tuăn ngôa rơkê mơngế hơnăm ối nếo Việt Nam hbrâ xêh, mơ-eăm pleăng hnoăng cheăng, veăng kum tung tơdroăng pơ’lêh nếo tơmiât pêi rơkê dêi tơnêi têa, mơjiâng ƀâng hnê mơhno vâ Chin phuh ƀă mâu kơ koan cheăng rah xo mâu tơdroăng ki rơkê dêi mơngế hơnăm ối nếo ‘na mâu tơdroăng ki kal ăm tơdroăng mơnhông mơdêk tơnêi têa.

A hneăng hôp tơpui tơno mơngế ki rơkê hơnăm ối nếo Việt Nam lâp plâi tơnêi roh kố hiăng ai chât pơkâ, pơkâ thế tung mơjiâng mơngế pêi cheăng xúa kơmăi kơmok, kŏng ngê̆ ƀă pơkuâ tung tơdroăng cheăng kâ xúa kơmăi kơmok ƀă 2 tơdroăng tơkêa bro kĭ vâ kum veăng pêi pro châ tơƀrê Tơdroăng Pơ’lêh xúa kơmăi kơmok Tơnêi têa dêi Chin phuh. Mâu rơkong tơpui tối dêi mâu ngế rơkê hơnăm ối nếo kô châ tơmâng xo ƀă châ môi tuăn mâu pơkâ, pâ thế ƀă Đảng, Tơnêi têa ‘na mâu tơdroăng ki tơtro ƀă pơkâ mơnhông mơdêk krá tơniăn tơnêi têa.

A Sa Ly tơplôu ƀă tơbleăng