VOV4.Xơ Đăng - Kơxo lơ 12/11, mâu tíu ki mơjiâng pro troăng pơtối rơnêu tơhnah tơhnâp troăng kân lăm ngi kong pơlê ki ê kơxô̆ 27C, kơpong văng Khánh Lê, ối tung tơring Khánh Vĩnh, kong pơlê Khánh Hòa klêi kơ’nâi hiăng ăm rơxế prôk lăm 1 troăng rơxế a kơmăng lơ 11/11. Xua tơdjâk kong mêi kân ton hâi, troăng kân lăm ngi kong pơlê ki ê kơxô̆ 27C, kơpong văng Khánh Lê tro tơhnâp a 4 tíu.

Tíu mơjiâng rơnêu troăng hiăng mơ-eăm rơnêu troăng vâ ăm rơxế prôk lăm a troăng kân lăm ngi kong pơlê ki ê troăng kân 27C

Tung mê, a Km41+300, kơpong tơkâ cheăm Sơn Thái, tơring Khánh Vĩnh, kong pơlê Khánh Hòa ai tơhnâp kĭng troăng pro chôm troăng kân, tơnêi hmốu tâp kơđu troăng tiô xêo dâng 9.000 met karê. Kơ koan xiâm pơkuâ troăng kân 3.3, Kơ koan xiâm pơkuâ Troăng kân III mơhnhôk mâu khu ki mơ’no liăn rơnêu troăng tơkŭm mơngế pêi cheăng, kơmăi kơmok vâ rĕng rơnêu troăng ăm rơxế kơtâu.

Mâu kơ koan cheăng pơchân tối kuăn pơlê tâng kal mê nếo lăm, tâng ôh tá ai tơdroăng kal pôi tá lăm troăng kố. Kong prâi dế ôh tá tơniăn a kơpong văng Khánh Lê, xua mê, tơ’lêi tơhnah tơhnâp, hliâk, tơ’lêi ai hmốu klêh ing ngo, loăng tơđôu.

A Sa Ly tơplôu ƀă tơbleăng