Tung plông a kơchôk hngêi kât ki tiah hmâ pơlê kân Đăk Tô, tơring Đăk Tô, kong pơlê Kon Tum, ngoh A Huyền mơnúa tôu dêi idrâp không ki tiah hmâ, dó inâi “Tiếng chày trên soc Bom Bo” ƀă idrâp không xua tơná ngoh pro dêi không ki mê. Ƀă kơpeăng kŏng ki rơkê khât, hiăng hmâ tôu dêi không tiô tơdrá ƀai hơdruê mê, ngoh A Huyền ai tối ‘na tơdroăng ki tơná hâk git kơ prôa kuăn ngo, tung mê ai không châ ngăn cho môi tơmeăm khoăng xah hêi chuât idrâp ki ai tơdrá ki ro rih dêi kong ngo Tây Nguyên.

“Không ki kố á mơjiâng pro tiô chal nếo, chiâng vâ tôu tiô tơdrá chal vâi krâ nah, ƀă xuân chiâng vâ tôu tiô tơdrá chal nếo. Vâ khoh mơjiâng pro không ki kố ga chía ton, phêa ki vâ pro không kố athế lăm tung kong ilâng, hơngế, klêi mê, nếo pôe, rơgi tiô kơ pin mơnúa hlŭm ăm ga chuât tro tơdrá ki pin hiăng pơkâ dêi, mâu klŏng phêa mê athế phu a on vâ ga chut, krá lĕm. Vâ mâu klŏng phêa mê tro klăng tiô tơdrá ki pin hiăng tơmiât, pin athế pôe, rơgi, ‘véa mâu klŏng phêa mê i krâu, rơhí rơhó, nhên, pin tơmâng i nhên, klŏng ki xŏn ga prông, klŏng ‘nâng ‘nâi ga chuât prŏng”.

Ôh ta xê to tơdroăng pro không xo ôh, mê ngoh A Huyền ối lăm tí tăng tôm, ‘mâi rơnêu hmốu, cho hmốu tơnĭng ki drêng tôu a hmốu ga chuât ai tơdrá, cho hmốu ki hiăng ton má môi ki ai a kơpong Tây Nguyên kố. Mâu kơtó hmốu ki ai xêh mê, hmâ lăm tí tăng tôm xo ing têa krông, klêi kơ’nâi ngoh A Huyền xo mâu hmốu ki mê mơjiâng chiâng prôa, cho tơnĭng, ga chuât phá tơviah krê xêh, maluâ cho hmốu ki pin hmâ trâm hlo, la drêng tơmâng ga chuât ki phá xêh, tơkéa vâ tối, môi tiah idrâp chuât dêi kong kế, ngo ngối.

Ngoh A Huyền ai tối, drêng ối tơxĭn nah, tung hiâm mơno ngoh hiăng hâk git khât kơ mâu idrâp chuât dêi không, klŏng put, tơnĭng, chêng koăng dêi mơngế Rơteăng. Xua mê, klêi kơ’nâi hriâm klêi Hngêi trung Đại học Văn hóa Nghệ thuật Quân đội a Hà Nội, vêh a pơlê xiâm Đăk Tô, Kon Tum, ngoh A Huyền hiăng rĕng vâ tí tăng pêi pro mâu tơdroăng cheăng a mâu hneăng po leh mơdĭng dêi pơlê pơla, cheăm bêng, kơhnâ khât tung tơdroăng ki mơjiâng pro prôa, không dêi hdroâng kuăn ngo.

Pakĭng tơdroăng ki mơjiâng pro mâu không, tơnĭng mê, ngoh A Huyền ối hmâ veăng hriâm, mơđah a mâu pơlê cheăm, tơring, kong pơlê a kơpong Tây Nguyên, lăm mơđah troh a Pơlê Túa lĕm tro-Ôm hyô mâu hdroâng kuăn ngo Việt Nam (Đồng Mô, Sơn Tây, Hà Nội).

“Á hiăng hmâ lăm mơđah hên mâu roh ki po tơdroăng xah hêi, môi tiah roh po kơchơ tê pơkeăng kong Sâm Ngọc Linh. Á xuân hiăng hmâ lăm tôu không, tơnĭng a hên tíu: Hà Nội, Sài Gòn ƀă Đà Nẵng. Hnoăng á ki veăng lăm mơđah mê xuân hiăng châ kâ pri, châ ƀâng kơdeăn khĕn, mê cho “Ngế rak on, rak pơlê, rak hnoăng cheăng tiô chal vâi krâ roh nah dêi kuăn ngo tơná”, châ kâ Mê dái Mêa, ƀă châ tơdah xo Hlá kơdeăn khĕn drêng lăm mơđah a Sài Gòn”.

Ôh ta xê to mơjiâng pro prôa, không mê ngoh A Huyền ối kơhnâ khât tung tơdroăng hnê túa rêi, tôu mâu tơmeăm ki xah dêi hdroâng kuăn ngo, hnê ăm vâi o hok tro ƀă vâi o, vâi muăn chal nếo. Pơla kố nah, Ƀơrô ngăn ‘na Tuá lĕm tro ƀă Tơbleăng tối tơdroăng nếo tơring Đăk Tô, kong pơlê Kon Tum hiăng tơrŭm ƀă Vi ƀan hnê ngăn pơlê kân Đăk Tô po lâm hnê tôu chêng koăng, kơhnhon xuăng ƀă mơjiâng pro mâu prôa, không ăm vâi droh rơtăm. Ngoh A Huyền hiăng kơhnâ khât tung tơdroăng hnê ăm 30 ngế vâi o, vâi muăn.

“Vâ chiâng tôu không mê athế đi đo hriâm plâ hâi plâ măng, mâu vâi o hok tro drêng lăm troh akố, mê athế hriâm sap ing 3 troh a 4 khế mê nếo chiâng tôu không. Mâu vâi o, vâi muăn vâi hâk git khât, vâi troh a kố vâ hriâm, drêng tâng idrâp không mâu vâ o hâk mơnâ ó khât, xua idrâp ki chuât mê hiăng mot tung mơheăm, tung tuăn mơno tơná pin. Dế nôkố, mâu vâi o, vâi muăn ki troh hriâm a ngoh A Huyền mê cho mâu vâi o, vâi muăn hriâm ing lâm 4, 7, 9 ƀă 10”.

Ƀă hiâm mơno ki hâk git khât mâu tơdrá prôa dêi kuăn ngo tơná, mê ngoh A Huyền xuân ối ai hên tơdroăng ki tô tuăn xâu lơ hía lôi khôi túa lĕm tro dêi kuăn ngo tơná. Tơdroăng rêh ối chal nếo ƀă kŏng ngê̆ nôkố, măng Facebook ƀă mâu túa ki nếo kô pro mâu vâi o, vâi muăn ôh tá rơhêng vâ pêi pro, rak vế mâu tơdroăng cheăng dêi pơlê pơla, môi tiah tôu chêng koăng ƀă rêi prôa, têng nêng, tôu không dêi kuăn ngo xếo. Xua ti mê, ngoh A Huyền hiăng kơdo mơ-eăm tơdjâ mâu tơmeăm khoăng ki mê, tơdroăng ki mê vêh ƀă tơná pơlê, gum ăm vâi o, vâi muăn chal nếo nôkố hlê plĕng ƀă hâk vâ ƀă khôi túa, vêa vong, tơmeăm khoăng dêi kuăn ngo tơná.

“Xua á hlo roh nôkố, vâi krâ ki chiâng, rơkê tôu không, rêi prôa, têng nêng, chêng koăng kuăn ngo ôh pá ối hên xếo, xua mê, á hiăng tơmiât kal athế pơtối rak vế ƀă hnê pơtho ăm mâu rơxông chal nếo, hnê i nhên ăm chal nếo ‘nâi kố cho mâu tơmeăm ki xah, ki kơnía dêi hdroâng kuăn ngo pin, la pin pơkal athế pơtối mơnhông ăm ga i lĕm tro tâ nếo, vâ mâu vâi pú tung tơnêi têa ƀă kong têa ê ‘nâi nhên tâ ‘na khôi túa, vêa vong, mâu tơmeăm xah hêi dêi kuăn ngo pin ga cho kơnía khât”.

Xuân chiâng vâ tối, ngoh A Huyền cho môi ngế hơnăm ối nếo, rơkê tung tơdroăng mơjiâng pro ƀă hnê tôu không, rêi prôa dêi kuăn ngo Rơteăng a tơring Đăk Tô, kong pơlê Kon Tum. Mâu hnoăng ki veăng rak vế, pêi pro mê dêi A Huyền ôh ta xê to pro kro tơ’nôm khôi túa, tơmeăm khoăng dêi hdroâng Rơteăng mê ối gum idrâp, tơdrá dêi Tây Nguyên rế châ hên ngế hâk vâ ƀă mơnê nhoăm.