Kơmăng lơ 1/2 , a tơring Văn Yên, kong pơlê Yên Bái tơkŭm po kân krip Leh tơbleăng Pơkâ chêh inâi ‘’Leh mơdĭng tơbâ Đông Cuông, tơring Văn Yên, kong pơlê Yên Bái’’ tung inâi Tơmeăm kơnía git mơhno khôi túa lĕm tro dêi Tơnêi têa. Mâu hơnăm hiăng hluâ, ƀă tơdroăng tơmâng má môi dêi mâu khu râ, kơvâ cheăng ƀă hrĭng kơjôi, troh a kố, Tíu koh tơbâ Đông Cuông hiăng ai ngiâ mêa kân lĕm rơdâ, krip, krúa lĕm, mơhno tơdroăng krip krih, krih tơviah, châ kơdrâm tơmối lâp lu kong pơlê ƀă kuăn pơlê châ hlo, mơnhên, kheăn kơdeăn drêng troh lăm ngăn, chôu nhang a tíu krih tơviah.

Klêi kơ’nâi leh tơbleăng pơkâ mơnhên Tơmeăm ki kơnía git mơhno khôi lĕm tro dêi tơnêi têa cho tơdroăng ngê̆ thuât ki má môi ƀă dó inâi ‘’Krih tơviah Nôu Thượng Ngàn’’. Leh mơdĭng tơkŭm po tung 2 hâi ƀă hên tơdroăng ki má môi môi tiah: Tơdroăng mơdĭng pleăng kơpôu xối xeăng; Mơdĭng pleăng Chúc Văn; Tơdroăng mơdĭng tơdah Nôu tơkâ têa kroăng ƀă mâu tơdroăng tơ’noăng ivá.