Tơdroăng kố ối tung mâu tơdroăng cheăng tơkŭm po mơđah tơbleăng kơphế Ƀuôn Ma Thuột rôh má 9, koh hâk 50 hơnăm tơleăng lĕm Ƀuôn Ma Thuột ƀă 120 hơnăm mơjiâng kong pơlê Dak Lak. Rôh tơ’noăng kố tơkŭm vâ chê 100 ngế ki tơ’noăng, ối tung 16 đô̆i tơ’noăng, dêi pơlê kân Liên Sơn, mâu cheăm Dak Liêng, Bông Krang, Yang Tao, tơring Lak ƀă Kŏng ti ôm hyô Lak Tedcam.

Mâu khu ki tơ’noăng vo plong mê vâi tơ’noăng a mâu tơdroăng ki vo plong loăng 2, 3 ƀă 4 ngế. Klêi mê, đô̆i tơ’noăng kơxô̆ 10 pơlê kân Liên Sơn hiăng plah tá 3 tơdroăng. Rôh tơ’noăng vo plong loăng kố cho khôi túa lĕm tro khôi hmâ dêi vâi krâ nhŏng o mơngế M’Nông ƀă mâu hdroâng kuăn ngo ki ê pêi cheăng tơnăng ká a kroăng Krông Ana ƀă long Lak ối tung tơring Lak.