VOV4.Sêdang - Pôa Đào Ngọc Dung, ngế xiâm ngăn cheăng pêi mố đô̆i rong – rêh ối pơlê pơla kĭ pơkâ tơdroăng ki mơjiâng 12 khu ki lăm séa ngăn tơdroăng pêi pro tŏng kum mâu ngế pêi cheăng ƀă ngế ki xúa mâu ngế pêi cheăng trâm pá xua pơreăng kân COVID-19. Mâu kăn ki séa ngăn kố ai hnoăng cheăng séa ngăn tơdroăng, klêi mê hnê mơhno tơdroăng ki pêi pro mâu tơdroăng pơkâ dêi Chin phuh ƀă pơkâ dêi Ngế pro xiâm hnê ngăn Chin phuh ‘na pêi pro troăng hơlâ tŏng kum rêh ối pơlê pơla ƀă tŏng kum mâu ngế pêi cheăng, ngế ki xúa mâu ngế ki pêi cheăng trâm pá xua pơreăng kân COVID-19.

‘Nâi nhên tơdroăng ki ôh tá ai mâu ngế pêi cheăng tung mâu kơvâ cheăng, tung mâu khu mơdró kâ, kơpong pêi cheăng ƀă kơmăi kơmok, kơpong mơjiâng pro kế tơmeăm; vâ pơkâ mơ’no mâu troăng hơlâ ‘mâi rơnêu ƀă ‘mâi mơnhông, mơdêk tíu pêi cheăng ƀă mâu rơkong pâ thế. Tung pơla mâu khu ki lăm séa ngăn sap ing lơ 21/10 troh tâi hâi lơ 3/11/2021.

Katarina Nga tơplôu ƀă tơbleăng