VOV4.Sêdang - Rôh hôp Khu tơrŭm cheăng pơlê pơla ASEAN má 10 pơxá “Mâu ngế cheăng pơlê pơla cho tíu xiâm dêi tơdroăng ‘mâi mơnhông klêi kơ’nâi COVID-19” châ tơkŭm po a kơxo lơ 21/9 tiô tơdroăng ki ‘no ing troăng hyôh internet. Kố cho tơdroăng xua Khu ngăn cheăng pêi mố đô̆i rong ƀă rêh ối pơlê pơla tơnêi têa pin ƀă hnoăng cheăng cho kăn hnê ngăn Khu tơrŭm ‘na hnoăng cheăng pơlê pơla ASEAN hneăng hơnăm 2020 – 2021 tơkŭm po.

Rôh hôp kố ai tơdroăng ki veăng ‘no tơdrêng ing troăng hyôh Internet dêi mâu kăn pơkuâ, tíu xiâm pơkuâ mâu kơ koan tơrŭm cheăng dêi ASEAN. Ƀă hnoăng cheăng kăn xiâm hnê ngăn Khu tơrŭm Hnoăng cheăng pơlê pơla ASEAN hneăng hơnăm 2020 -2021, Việt Nam hiăng tơrŭm krá tơniăn ƀă mâu kong têa ki tơrŭm cheăng ASEAN, Khu râng liăn tŏng kum vâi hdrêng Khu lâp kong têa ƀă mâu khu ki tơrŭm cheăng ki ai tơdjâk mơdêk mơjiâng ƀă pêi klêi tơdroăng ki pêi pro tối tơbleăng Hà Nội ‘na mơdêk Hnoăng cheăng pơlê pơla troh pơlê pơla ASEAN tơrŭm ƀă hbrâ rơnáu vâ pơtroh ăm Hneăng hôp khu kăn xiâm ASEAN rôh má 38 a khế 10 la ngiâ.

A rôh hôp, teăng mâ ăm mâu kơ koan cheăng dêi ASEAN ƀă mâu khu tơrŭm cheăng, hiăng rơtế veăng tơpui tơno ƀă ‘mâi mơnhông klêi kơ’nâi COVID-19, tung mê, tơkŭm tung mâu kơvâ cheăng rak ngăn, khăm pơlât ƀă ‘mâi mơnhông ăm tơdroăng ki pơxúa dêi pơlê pơla. Tung rôh po hôp hiăng po leh tơbâ 10 hơnăm Khu tơrŭm cheăng pơlê pơla ASEAN (2021 – 2022).

Katarina Nga tơplôu ƀă tơbleăng