VOV4.Sêdang -  Jâ Rơchâm H’Déo  kuăn ngo Jarai, cho kăn hnê ngăn Vi ƀan Măt trâ̆n tơnêi têa kong pơlê Gia lai hak tơngăm châ pơcháu tơdroăng cheăng rah xo 9 to loăng kơnía ing Tây Nguyên djâ lăm pêt a pơlê kong xiâm Hà Nội pêt tung kơdrum hngêi ‘măn poăng Pôa Hồ Chí Minh, Kăn xiâm hnê ngăn tơnêi têa ki apoăng. Hâi leh pêt loăng pakĭng hngêi ‘măn poăng Pôa cho môi hâi leh kân hlo chiâng ƀriê lo têa mâ ƀă mâu hdroâng kuăn ngo kong pơlê Gia Lai.

Khu kăn ai vâ chê 50 ngế xua jâ Rơ Châm H’Déo pro ngế xiâm pơkuâ djâ khu mâu krâ pơlê, mâu ngế pơkuâ ‘na loi tĭng tiô khôp, mâu ngế ki teăng mâ mâu rêm hdroâng kuăn ngo ki dế rêh ối tung kong pơlê Gia Lai.

Tung hâi leh krip ro ƀă ƀriê lo têa mâ mê, jâ Rơ Châm H’Déo hiăng teăng mâ mâu hdroâng kuăn ngo ki rêh ối tung kong pơlê Gia Lai tối mơnê  khât ƀă mâu hnoăng pêi cheăng ki kân dêi Đảng, Pôa Hồ.

Lối 10 hơnăm hdrối, mâu loăng kơnía dế rế xông rơdêi, chiâng loăng kân xâp rơngiâp pakĭng Hngêi ‘măn poăng Pôa , cho vâ pơto pơtih hiâm mơno lĕm kâi chân tŭm tơdroăng,  ki krá dêi mâu hdroâng kuăn ngo Tây Nguyên môi tuăn tiô Pôa, tiô Đảng. hâi kố lơ 2/9, leh tơbâ 76 hơnăm Hâi mơjiâng tơnêi têa, jâ Rơ Châm H’Déo tối:

“Hâi lơ 2/9/1945, Pôa Hồ pơchuât hlá mơ-éa mơjiâng tơnêi têa Việt Nam. Ing mê, troh nôkố hiăng luâ 76 hơnăm. Kơnôm châ tơniăn lĕm nôkố kuăn pơlê mơngế Jarai, Bơhnéa nếo ai tơdroăng rêh ối hơniâp ro. Kơ’nâi hơnăm 1945 troh hơnăm 1946 ai Hneăng hôp kân mâu hdroâng kuăn ngo, tơkŭm tâi tâng mâu hdroâng mơngế ki rêh ối tung tơnêi têa Việt Nam, rơtế veăng ƀă dêi rơpó plâ Pơhlăng vâ tơbriât pro tơleăng lĕm.

Tối to a Gia Lai tê, vâi krâ nhŏng o mơngế Jarai, Bơhnéa, môi tiah Pôa Hồ hiăng tối nah: “Mơhé mơngế Xuăn lơ Thổ, Mường lơ Mán, Jarai, Bơhnéa, Rơđế , Rơteăng xuân cho nhŏng o môi klêa môi klâm, thế ‘nâi tơrŭm môi tuăn dêi rơpó, veăng ‘no ivá tơplâ vâ kring vế dêi tơnêi têa cho tơnêi têa tơchoâm. Xua ti mê, rêm ngế kuăn pơlê ki rêh ối tung tơnêi têa kố cho nhŏng o pu tâi, ôh tá ai ngế ki lâi lôi pá rŏng, ôh tá ai ngế ki lâi tro hvât lôi, mơhé mơngế hiăng krâ, plôm mâ, chó chêng tơvê kŏn , mơngế kơtiê xơpá xuân châ kum ƀă mơjiâng tơnêi têa”.

Gương tơplôu ƀă tơbleăng