VOV4.Xơ Đăng - Tiô tơdroăng hneăng hôp, hâi lơ 12/11, Kuô̆k hô̆i pơtối kơ-êng ƀă tiâ rơkong kơ-êng ƀă Ngế xiâm pơkuâ ‘na pơkâ troăng pêi cheăng ƀă mơ’no liăn cheăng; pôa Phạm Minh Chính, Ngế pro xiâm hnê ngăn tơnêi têa xuân mơnhên mâu tơdroăng ki tơdjâk ƀă tiâ rơkong kơ-êng dêi kăn teăng mâ Kuô̆k hô̆i. Tung kơxê lơ 11/11, Kăn xiâm hnê ngăn Kuô̆k hô̆i xuân hiăng pơkuâ kơ-êng khu tơdroăng má pŭn ối tung kơvâ pơkâ pêi ƀă mơ’no liăn cheăng.

Hên hĭn tơdroăng ki tô hiăng châ mâu kăn teăng mâ Kuô̆k hô̆i pơkâ ƀă pôa Nguyễn Chí Dũng, Ngế xiâm pơkuâ pơkâ troăng pêi cheăng ƀă mơ’no liăn cheăng, môi tiah: Troăng rak tơniăn ƀă mơnhông cheăng kâ tung pơla tơdroăng rêh ối nếo; tŏng kum, tah lôi pá puât ăm khu tê mơdró vâ pro tơniăn, mơnhông pêi kâ, tê mơdró; troăng thăm pêi pro rĕng ‘na mơ’no liăn cheăng tơnêi têa, ki má lối cho mâu tơdroăng tơkêa bro ki xiâm tơnêi têa. Tiâ rơkong kơ-êng dêi kăn teăng mâ, pôa Nguyễn Chí Dũng mơnhên, tơdroăng ki hrá mơ’no liăn cheăng tơnêi têa cho xua troăng pêi pro tơdroăng tơkêa bro mơ’no liăn cheăng a kong pơlê.

‘Na troăng rak tơniăn ƀă mơnhông cheăng kâ tung pơla tơdroăng rêh ối nếo, pôa Nguyễn Chí Dũng mơnhên, kơxô̆ liăn mơnhông cheăng kâ a hơnăm 2009 hiăng châ tơƀrê kum mơnhông cheăng kâ hneăng kơ’nâi mê, laga xuân hiăng ăm hlo túa ki rơkê tơtro vâ mơjiâng kơxô̆ liăn mơnhông cheăng kâ châ pêi pro tơtro tâ tung hneăng la ngiâ.

A Sa Ly tơplôu ƀă tơbleăng