VOV4.Sêdang - Hâi lơ 28/9, xông tơpui mơgêi roh hôp mơ’no tơdrêng tung um tiô troăng măng Internet ‘na mơ’no liăn mơjiâng pro tơmeăm tơdjuôm pơlê pơla, pôa Phạm Minh Chính, Ngế pro xiâm hnê ngăn Chin phuh tối nhên, Chin phuh, Ngế pro xiâm hnê ngăn Chin phuh hiăng ai hên pơ’lêh nếo, kơtăng tung hnê mơhno pơkuâ pơkâ mơ’no liăn mơjiâng tơmeăm tơdjuôm pơlê pơla hơnăm 2021.

Ngế pro xiâm hnê ngăn Chin phuh hnê mơhno thăm rĕng pêi pro tơdroăng mơ’no liăn cheăng mơjiâng tơmeăm tơdjuôm pơlê pơla

Chin phuh, Ngế pro xiâm hnê ngăn Chin phuh đi đo mơnhên troăng pêi la ngiâ, pơkâ pêi tung hnê mơhno, pơkuâ cho ‘’mơ-eăm kơxô̆ liăn mơ’no cheăng hơnăm 2021 châ lối 95% pơkâ pêi, kum kal khât tung tơdroăng xông tơtêk ƀă mơnhông mơdêk cheăng kâ tung pơla pơreăng kân COVID-19’’.

Tơdroăng mơ’no liăn cheăng mơjiâng tơmeăm tơdjuôm pơlê pơla hiăng châ pêi pro tơdâng tơ’mô ƀă châ tơƀrê hên. Ngế pro xiâm hnê ngăn tơnêi têa mơnhên, mơ’no liăn mơjiâng pro tơmeăm pơlê pơla cho môi tơdroăng xiâm ki kal, vâ pêi kêi đeăng tung pơkâ mơnhông mơdêk cheăng kâ – rêh ối pơlê pơla 2021, tung mâu khế pơtối dêi hơnăm 2021, Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng, kong pơlê pêi pro kơtăng, tơdâng tơ’mô mâu troăng pêi, tah lôi teăm tơdrêng mâu tơdroăng ki mơdât, pá puât tơvâ tơvân, tah lôi tíu ki kreăng vâ thăm pêi pro rĕng tâ tung pêi pro mơ’no liăn cheăng.

A Sa Ly tơplôu ƀă tơbleăng