VOV4.Sêdang - Hâi lơ 13/9, pôa Phạm Minh Chính, Kăn pơkuâ hnê mơhno tơnêi têa hbrâ, mơdât pơreăng COVID-19 pơkuâ roh hôp mơ’no tơdrêng tung um tiô troăng măng Internet ƀă mâu cheăm, bêng, pơlê kân, tơring, pơlê krâm, pơlê kong kơdrâm, mâu kong pơlê Tiền Giang, Kiên Giang ‘na tơdroăng hbrâ mơdât COVID-19. Kố cho 2 kong pơlê ai pơreăng xông tâ tú râ ó.

Xông tơpui a roh hôp, pôa Phạm Minh Chính, Ngế pro xiâm hnê ngăn Chin phuh môi xôh nếo mơnhên ki tro dêi troăng hơlâ xo cheăm, bêng pro ‘’pơkôt ki kân’’, kuăn pơlê cho “mâu lêng”; kuăn pơlê hlối cho tíu xiâm, rế cho ngế ki xiâm tung hbrâ, mơdât pơreăng. Tơdroăng djâ tíu pơlât achê kuăn pơlê má môi hiăng kum kal khât kơdroh ki hâ ho a hngêi pơkeăng râ kơpêng, mơngế tro tâ pơreăng rĕng châ khăm pơlât ƀă kơdroh hâ ho a hngêi pơkeăng râ kơpêng, kơdroh kơxô̆ mơngế hlâ.

A tíu hrik hyôh um Chin phuh

Krê péa kong pơlê Kiên Giang, Tiền Giang tơdroăng pơreăng xuân ối xông tâ tú ó; hên mâu cheăm, bêng, pơlê kân cho kơpong ôh tá ai pơreăng ‘’dế ngiât, dế (ai mơngế tâ pơreăngiâ)  ‘’khêi iâ’’ chiâng kơpong (ai hên mơngế tâ pơreăng) ‘’kơpong khêi’’, mê cho tơdroăng ki tô tuăn. Ngế pro xiâm hnê ngăn tơnêi têa vâ tơmâng 2 kong pơlê kố tối ‘na tơdroăng pơkuâ, hnê mơhno hbrâ, mơdât pơreăng, ing mê mơ-eăm mơnhên xiâm kối, ing mê pơ’lêh mâu troăng tơkŭm pêi pro mâu troăng hbrâ mơdât pơreăng châ tơƀrê.

A Sa Ly tơplôu ƀă tơbleăng