VOV4.Sêdang - Hâi lơ 13/9, pôa Phạm Minh Chính, Ngế pro xiâm hnê ngăn tơnêi têa hiăng pêi cheăng ‘no tơdrêng ing troăng hyôh internet ƀă péa to kong pơlê Tiền Giang prếi Kiên Giang ‘na hnoăng cheăng hbrâ mơdât pơreăng COVID-19. Mơgêi rôh hôp, pôa Phạm Minh Chính tối nhên, rôh hôp ‘no tơdrêng ing troăng hyôh Internet ƀă péa to kong pơlê, ‘no tơdrêng troh a cheăm, bêng, pơlê kân cho vâ châ hmâng tơ’nôm mâu rơkong tơpui tối pâ thế dêi mâu khu ki rơkê plĕng, ai tơ’nôm tơdroăng ki hlê plĕng, ‘mâi mơnhông ivá rơkê tung khăm pơlât, hlê plĕng tâi tâng ‘na mâu troăng hơlâ hbrâ mơdât pơreăng.

Tâ tá rôh hôp ‘no tơdrêng ing troăng hyôh internet

Péa to kong pơlê Kiên Giang, Tiền Giang ai mơ-eăm hên, pêi pro klâ ối krê pơlê pơla tung 2 khế kố, laga, to lâi măng tĭng hdrối nah, tơdroăng tá hâi kâi hbrâ mơdât môi tiah tơdroăng rơhêng pói vâ. Ngế pro xiâm hnê ngăn tơnêi têa pơkâ tơdroăng ƀă tối tiah kố, ai tá xiâm kối ‘na hnoăng cheăng pơkuâ, hnê mơhno, ai xiâm kối ‘na tơkŭm pêi pro. Klêi kơ’nâi tơpui tơno a râ kong pơlê, cheăm, bêng mê hlo mâu khu kố xuân tá hâi hlo tơƀrê, troăng hơlâ tá hâi ‘nâi nhên, tơkŭm pêi pro xuân ối tro kơdrâ, tá hâi hlê plĕng khât; tiô tối hdrối tơdroăng tá hâi krá, tá hâi tơtro ƀă ki ai khât tâng vâ pơchông ƀă ki ôh tá tơniăn dêi pơreăng.

Pôa Phạm Minh Chính pơkâ thế Tiền Giang prếi Kiên Giang kal mơ-eăm tâ nếo tung hbrâ mơdât pơreăng COVID-19, rĕng pêi pro kơdroh tơdroăng ki pơreăng tâ tú.

Katarina Nga  tơplôu ƀă tơbleăng