VOV4.Xơ Đăng - A rôh hôp Chin phuh tiah hmâ khế 11/2021 po a kơxo lơ 2/12 a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkâ thế tơdế khế 12 kô hiăng pêi klêi tơdroăng ki pâk vaccine trum má péa ăm mâu ngế ki sap ing 18 hơnăm tơngi klêng, athế tơkŭm pâk ăm vâi hdrêng sap ing 12 hơnăm tơngi klêng vâ ăm mâu vâi muăn châ vêh hriâm a hngêi trung tiô túa ki tiah hmâ ƀă tro túa pơkâ vâ pêi pro tơbleăng pâk trum má 3.

Tơpui mơgêi rôh hôp, pôa Phạm Minh Chính, Ngế pro xiâm hnê ngăn tơnêi têa mơhno nhên, pơreăng troh nôkố hiăng châ hbrâ mơdât tung lâp tơnêi têa, apoăng hiăng châ tiô pơkâ mơ’no, pro kuăn pơlê loi tơngah ƀă phiu ro, khu mơdró kâ ‘mâi mơnhông cheăng kâ. ‘Na hnoăng cheăng tung la ngiâ, Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng, kong pơlê pơtối ‘nâi nhên, tiô tối tơbleăng tro tơdroăng, malối cho ‘na pơreăng COVID-19; kơhnâ pêi pro hmâ tơniăn, rơkê, hbrâ mơdât tơƀrê pơreăng COVID-19 tiô pơkâ 128 dêi Chin phuh.

Katarina Nga tơplôu ƀă tơbleăng