VOV4.Xơ Đăng - Kơmăng hâi lơ 23/11, tiô chôu Việt Nam, drêng rôh lăm pôu păng ‘nâng kong têa Nhuk, pôa Phạm Minh Chính, Ngế pro xiâm hnê ngăn tơnêi têa pin hiăng trâm mâu khu ki rơkê plĕng, khu ki hriăn ‘na khoa hok mơngế Việt Nam a Nhuk. A rôh trâm mâu ngế ki rơkê plĕng, mâu khu ki hriăn ‘na khoa hok hiăng tối tơbleăng ăm Ngế pro xiâm hnê ngăn tơnêi têa mâu kế tơmeăm, mâu tơdroăng ki vâi hriăng pro chiâng tung mâu kơvâ cheăng môi tiah điê̆n tưh, on tơhrik ki vêh pro nếo, khăm pơlât, tuăn ngoâ rơkê ƀă hên ki ê.

Rơkâu, veăng phiu ro ƀă mâu ki hriăn ‘na khoa hok, Ngế pro xiâm hnê ngăn tơnêi têa tối nhên pơkâ thế mơdêk ki kơnía dêi kuăn mơngế, tuăn ngoâ Việt Nam, tơdrêng amê hnối tối ƀă pơkâ mâu tơdroăng ki hriăn ngăn ki ai khât dế pâ thế. Ngế pro xiâm hnê ngăn tơnêi têa rơhêng vâ mâu khu ki rơkê plĕng, mâu khu ki hriăn ‘na khoa hok Việt Nam a Nhuk pơtối mơ-eăm hriăn ngăn, ai hên tơdroăng ki chiâng pro kế tơmeăm, mâu tơdroăng ki kal, xúa tơdroăng tơrŭm ƀă mâu khu ki hriăn ngăn khoa hok, mâu khu  tơrŭm khoa hok tung lâp plâi tơnêi, djâ tuăn ngoâ, ivá mơ-eăm dêi tơná pleăng ăm pơlê cheăm tơnêi têa veăng kum ‘mâi mơnhông tơrŭm tơroâ, pơla péa tơnêi têa Việt Nam – Nhuk.

Xuân tung kong măng hâi lơ 23/11, pôa Phạm Minh Chính hiăng ai rôh trâm kuăn pơlê Việt Nam a Nhuk; Ngế pro xiâm hnê ngăn tơnêi têa tối nhên, Đảng, Tơnêi têa đi đo pro tơ’lêi hlâu má môi vâ kăn pơlê Việt nam ki rêh ối a Nhuk veăng kum mơjiâng ƀă mơnhông tơnêi têa.

Katarina Nga tơplôu ƀă tơbleăng