VOV4.Sêdang - Kơxo lơ 26/10, pôa phạm Minh Chính, Ngế pro xiâm hnê ngăn Chin phuh, pơkuâ khu kăn xiâm Việt Nam veăng hôp tơdrêng tung troăng hyôh internet Hneăng hôp mâu kăn Khu tơrŭm mâu kong têa Đông Nam Á roh má 38 ( ASEAN 38) tiô tơdroăng krếo thế dêi pôa Hasanal Bolkiah pơtao kong têa Brunei, Kăn xiâm hnê ngăn ASEAN hơnăm 2021. Hneăng hôp mê cho rôh vâ Việt Nam pơtối mơhno troăng rơhlâ tơná tơpui tơno tơniăn, pơkuâ dêi, hên troăng, hên túa, tơrŭm tơrôa ƀă lâp plâi tơnêi tung tâi tâng tơdroăng ƀă po trâu rơdâ.

Tơpui a hneăng hôp, pôa Phạm Minh Chính tối tiah kố, tơdrêng ƀă  rak tơniăn hnoăng hiăng châ pêi pro, mơdêk ƀă hlối tơ-rŭm tung kơpong, mơjiâng khu kuăn pơlê, kal ‘nâi nhên tíu ki tơná ối nếo dêi ASEAN tung tơdroăng tơrŭm cheăng kâ kal kí dế pơtối ‘mâi mơnhông dêi lâp plâi tơnêi. Mâu kong têa tung ASEAN kal ‘mâi mơnhông hnoăng cheăng cho ki xiâm dêi mâu tơdroăng hôp tơpui tơno, tơrŭm cheăng ƀă hlối tơrŭm cheăng kâ hên troăng, hên râ a kơpong. Vâ veăng trâu rơdâ tâ a mâu todroăng cheăng tung kơpong ƀă lâp plâi tơnêi, mơdêk ki tơ’mot dêi mâu kong têa cheăng kâ tê mơdró dêi ASEAN ƀă mơdêk tung ‘mâi mơnhông cheăng kâ klêi kơ’nâi ai pơreăng kân.

Klêi kơ’nâi veăng hôp a Rôh hôp khu kăn xiâm ASEAN 38, pôa Phạm Minh Chính, Ngế pro xiâm hnê ngăn Chin phuh pơkuâ djâ khu kăn xiâm Việt Nam veăng hôp a Rôh hôp khu kăn xiâm ASEAN 39. Tơpui a Rôh hôp, pôa Phạm Minh Chính, Ngế pro xiâm hnê ngăn Chin phuh tối, rơhêng vâ ai môi tơdroăng kơpong hơniâp lĕm, gâk kring, tơniăn ƀă tơrŭm cheăng vâ tơkŭm hbrâ mơdât pơreăng, ‘mâi mơnhông cheăng kâ ƀă pơtối mơnhông mơdêk kro mdrŏng tung khu.

Laga, tung tơdroăng ki ai khât châ hlo mâu tơdroăng ki ôh tá tơniăn, tơdjâk tơdrêng troh tơdroăng tơniăn tung kơpong . Pôa Phạm Minh Chính xuân pơkâ thế ASEAN kal ai tơdroăng tơmiât môi tuăn pôu râng hnoăng cheăng, loi nhuô̆m luât kong têa ê pơkâ, pôi tá pro tơdjâk troh tơdroăng ki hơniâp lĕm, tơniăn tơrŭm ƀă mơnhông a kơpong, loi nhuô̆m hnoăng cheăng dêi ASEAN  ƀă tí tăng ‘nâi tŭm ƀă ASEAN ing tơdroăng pơkâ, rôh hôp xua ASEAN mơjiâng ƀă pơkuâ, ASEAN rak vế hnoăng cheăng cho tíu xiâm.

Gương- Katarina Nga tơplôu ƀă tơbleăng