VOV4.XơĐăng - Hâi lơ 29/12, a Hà Nội, pôa Phạm Minh Chính, Ngế pro xiâm hnê ngăn Chin phuh veăng hôp mơ’no tơdrêng tung lâp tơnêi têa mơgêi tơdroăng cheăng hơnăm 2021, tơbleăng pơkâ pêi hơnăm 2022 dêi kơvâ pêi chiâk deăng ƀă mơnhông mơdêk thôn pơlê, xua khu xiâm ngăn pêi chiâk deăng ƀă mơnhông thôn pơlê tơkŭm po. Hơnăm 2021, kơvâ ngăn pêi chiâk deăng ƀă mơnhông mơdêk thôn pơlê pơtối tơbleăng tơdroăng cheăng tung pơla trâm hên xơpá, pơloăng mơnúa; la ga xuân mơdêk tơ-ƀrê luâ pơkâ tiô pơkâ “Tơpéa tơdroăng”; hlối hbrâ mơdât pơreăng châ tơ-ƀrê hlối mơnhông cheăng kâ, pro pơxúa tŭm tiô púi vâ,  xúa tung tơnêi têa ƀă tê ăm kong têa ê.

Hơnăm 2021, ki pơxúa dêi tâi tâng kơvâ cheăng (VA) tâk 2,85-2,9%, tơdroăng pơkâ tê kế tơmeăm ăm kong têa ê  tâi tâng kơvâ cheăng châ 48,6 rơtal dollars. Hên pơkâ mơnhông mơdêk dêi kơvâ cheăng ƀă luâ tơdroăng pơkâ Hơnăm 2022, tâi tâng kơvâ cheăng tơkŭm pêi kơtăng tơdroăng cheăng pêi tro tiô ki pơxúa ƀă mơnhông mơdêk krá tơniăn. Tối mơgêi hneăng hôp, pôa Phạm Minh Chính pơkâ thế tâi tâng kơvâ cheăng kal thế hnê tối nhên tơdroăng cheăng pêi vâ hmâ tơniăn lĕm, rơkê ƀeăn, séa ngăn tơ-ƀrê dêi pơreăng COVID-19, rak vế tơniăn ivá, kuăn pơlê rơtế ƀă tơdroăng pơtối tah ki xơpá tung pêi cheăng, tê mơdró, kum tơ-ƀrê ăm kuăn pơlê ƀă khu mơdró. Xúa tơ-ƀrê vâ ‘mâi mơnhông cheăng kâ rêh ối mơnhông kơvâ cheăng pêi tung pơla dế ai tơdroăng tiah hmâ nếo.

Gương tơplôu ƀă tơbleăng