VOV4.Sêdang - Kơxo lơ 22/9, a Hà Nội, pôa Phạm Minh Chính, Ngế cheăng tung tíu xiâm Kal kí, Ngế pro xiâm hnê ngăn Chin phuh hiăng veăng leh mot hơnăm hriâm nếo 2021-2022 dêi hngêi trung hnê cheăng lêng  (Khu xiâm pơkuâ ngăn lêng). Hơnăm hriâm 2021-2022, Hngêi trung tơkŭm hnê mơdêk tơƀrê tâi tâng tơdroăng hriâm lêng- hnê mơjiâng tuăn ngôa rơkê tiô túa nếo, luât pơkâ hriâm, séa ngăn, tối tơdroăng ki tơ-ƀrê; pơkâ pêi kơtăng “3 tơdroăng ki khât” khŏm kâi plâ mơdât tơdroăng ki ‘mêi, tơdroăng ki rơhêng tối ai hnoăngtung hnê, hriâm, tơdroăng cheăng. 

Pôa Phạm Minh Chính, Ngế pro xiâm hnê ngăn Chin phuh tối pơchân: hơnăm hriâm 2021-2022, Hngêi trung hnê cheăng lêng kal thế hbrâ rơnáu ‘nâi tŭm tơdroăng ƀă tối tơbleăng hdrối, séa ngăn nhên khât tơdroăng ki nếo ƀă tơdroăng pơreăng tâ tú; kal “Pro tơ-ƀrê tung pơ’lêh nếo tŭm tơdroăng ‘na hnê hriâm ƀă hnê mơjiâng tuăn ngôa rơkê, mơnhông tơbrê rế ai hên ngế ki rơkê, tơ’mot hên ƀă châ xúa mâu ngế ki rơkê pêi cheăng’’.

Mơjiâng, tơbleăng pơkâ hnê hriâm, hnê mơjiâng tuăn ngôa rơkê ƀĕng ƀeăn, hmâ ƀă mâu khu ki ai tâ tú dêi pơreăng vâ pê klêi tơdroăng dêi tơrêm ngế ƀă tơniăn ‘na hnê hriâm, hnê mơjiâng tuăn ngôa rơkê.

Katarina Nga tơplôu ƀă tơbleăng