VOV4.Sêdang - A pơlê kong xiâm Paris, kong têa Pơhlăng, khu pơkuâ tơƀai Bamboo Airways ƀă Grup pơkuâ Safran hiăng kĭ tơkêa Mơ-éa chôu vế tơrŭm cheăng ing châ hlo mâ dêi pôa Phạm Minh Chính, Ngế pro xiâm hnê ngăn tơnêi têa Việt Nam ƀă pôa Jean Castex, Ngế pro xiâm hnê ngăn kong têa Pơhlăng. Tơdroăng kố ối tung tơdroăng dêi roh lăm pôu pêi cheăng a kong têa Pơhlăng sap hâi lơ 3 – 5/11 dêi pôa Phạm Minh Chính, Ngế pro xiâm hnê ngăn tơnêi têa.

Ngế pro xiâm hnê ngăn tơnêi têa Việt Nam ƀă Pơhlăng veăng leh kĭ môi tuăn 2 rơtal Euro pơla Bamboo Airways ƀă Safran

Akố, Khu pơkuâ tơƀai Bamboo Airways ƀă Safran – Grup pơkuâ má môi lâp plâi tơnêi tung kơvâ kih thuât tơƀai – hiăng kĭ tơkêa mơ-éa chôu vế tơrŭm cheăng 'na tơdroăng rah xo kơmăi tơƀai ƀă mâu tơmeăm tơƀai ăm tơmeăm 50 toăng tơƀai A321NEO ƀă 30 toăng tơƀai Boeing 787-9 dêi Bamboo Airways.

Tâi tâng ki kơnâ mâu tơdroăng tơpui tung Mơ-éa chôu vế tơrŭm cheăng tiô xêo châ 2 rơtal Euro. Hiăng châ mơjiâng tơrŭm cheăng ton xŏn ƀă Việt Nam sap hơnăm 2013, troh nôkố Pơhlăng ƀă Việt Nam ai tơrŭm krá tơniăn, tơrŭm rơtế mơnhông mơdêk tung hên kơvâ cheăng. Tung kơvâ tơƀai pơto kuăn pơlê, Việt Nam – Pơhlăng ai tơrŭm tiô khôi vâi krâ nah, tơrŭm hên troăng. Kơ koan xiâm pơkuâ tơƀai Việt Nam ƀă Kơ koan xiâm pơkuâ tơƀai pơto kuăn pơlê kong têa Pơhlăng hiăng kĭ môi tuăn ‘na kih thuât.

A Sa Ly tơplôu ƀă tơbleăng