VOV4.Sêdang - A Hà Nội nếo tơkŭm po Hneăng hôp pơla Khu hnê mơhno má môi Chin phuh ƀă Khu hnê mơhno má môi Vi ƀan xiâm Măt trâ̆n Tơnêi têa Việt Nam. Xông tơpui a Hneăng hôp, pôa Phạm Minh Chính, Ngế pro xiâm hnê ngăn Chin phuh tối nhên, Măt trâ̆n tơnêi têa Việt Nam kal tơrŭm krá tơniăn tâ nếo ƀă Chin phuh tung hriăn plĕng, pêi kêi đeăng troăng pơkâ pêi, troăng hơlâ, luât, pro tơ’lêi hlâu vâ Kuăn pơlê mơnhông hnoăng pơkuâ, veăng châ tơƀrê tung pơkuâ tơnêi têa, pơkuâ pơlê pơla.

Hneăng hôp khu hnê mơhno má môi Chin phuh ƀă Khu hnê mơhno Vi ƀan xiâm Măt trâ̆n Tơnêi têa Việt Nam

Chin phuh pơkâ thế Măt trâ̆n Tơnêi têa Việt Nam ƀă mâu khu cheăng kal kí – rêh ối pơlê pơla, Khu pơtâng tối mơhnhôk kuăn pơlê Tơnêi têa rơtế ƀă Chin phuh, tơdjuôm ivá, môi hiâm mơno tung pêi pro mâu hnoăng cheăng ki xiâm ki Hneăng hôp XIII dêi Đảng hiăng pơkâ mơ’no môi tiah: Kâi trâng tơniăn, ƀeăn ƀĕng, mơdât châ tơƀrê pơreăng COVID-19, rế hbrâ mơdât pơreăng châ tơƀrê, rế vêh mơnhông ƀă thăm mơnhông cheăng kâ – rêh ối pơlê pơla, tơniăn tơdroăng rêh ối pơlê pơla ƀă tơniăn kuăn pơlê, tơniăn lâp pơlê pơla cho hnoăng cheăng ki thâ, kal khât, ối má môi tung hneăng nôkố.

A Sa Ly tơplôu ƀă tơbleăng