VOV4. Sêdang - Kơxê lơ 15/9, pôa Phạm Minh Chính, Ngế pro xiâm hnê ngăn Chin phuh pơkuâ Hneăng hôp lâp tơnêi têa “Khu mâu ngế rơkê khoa hok ƀă Kŏng ngê̆ Việt Nam pêi pro Pơkâ Hneăng hôp roh má XIII dêi Đảng”. Xông tơpui a Hneăng hôp, pôa Phạm Minh Chính, Ngế pro xiâm hnê ngăn Chin phuh teăng mâ Khu râ kăn pơkuâ Đảng, Tơnêi têa, kheăn kơdeăn ƀă mơnê mâu tơdroăng veăng tŏng kum kân kĭn dêi khu mơngế rơkê khoa hok ƀă Kŏng ngê̆, dêi hên rơxông mâu ngế cheăng khoa hok tơnêi têa, dêi Khu tơrŭm mâu Khu ngế Khoa hok ƀă Kih thuât Việt Nam.

Ngế pro xiâm hnê ngăn tơnêi têa kheăn kơdeăn tơdroăng ki pleăng kân kĭn dêi khu mơngế rơkê khoa hok ƀă kŏng ngê̆

La ngiâ, tơdroăng lâp plâi tơnêi pơtối xông tâ tú ó, pơreăng COVID-19 kô pơtối tơdjâk ‘mêi ƀă pro ôh tá tơniăn troh cheăng kâ lâp plâi tơnêi, kơpong, tung mê, ai tơnêi têa pin. Ngế pro xiâm hnê ngăn tơnêi têa pơkâ ‘’pin thế khŏm mơ-eăm hên, mơ-eăm kân tâ mê nếo, rŭm môi tuăn rơdêi tâ mê nếo vâ mơ-eăm pêi pro ƀlêi trâng Pơkâ Hneăng hôp XIII dêi Đảng. Ƀă hnoăng cho khu ki teăng mâ ăm mâu ngế rơkê khoa hok ƀă kŏng ngê̆, Khu tơrŭm ƀă mâu khu ki pêi cheăng tung khu kal pêi tơtro tâ mê nếo hnoăng cheăng cho tơdroăng xiâm kal kí, mơjiâng khu rŭm môi tuăn vâ kum pêi pro ƀlêi trâng mâu pơkâ kal kí dêi tơnêi têa tung hneăng nếo’’.

A Sa Ly tơplôu ƀă tơbleăng