VOV4.Sêdang - Kơxê lơ 14/9, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng ai rôh pêi cheăng ƀă Kăn teăng mâ hàn Quốc ƀă mâu khu tơrŭm, tê mơdró Hàn Quốc a Việt Nam. Ngế pro xiâm hnê ngăn tơnêi têa tối nhên pơreăng kân cho tơdroăng ki xơpá dêi lâp plâi tơnêi mê kal túa ki châ tŏng kum tung lâp plâi tơnêi, kal tơdroăng tơrŭm ƀă veăng tơdjuôm ivá dêi tâi tâng rêm pâ vâ hbrâ mơdât. Ngế pro xiâm hnê ngăn tơnêi têa pơkâ thế peăng Hàn Quốc pơtối tŏng kum Việt Nam ai vaccine hên má môi, rĕng má môi ƀă hên tơdroăng ki phá tơ-ê dêi rơpó, malối cho tung khế 9, khế 10 kố ƀă tơrŭm hnê tối kơmăi kơmok, mơjiâng pro vaccine, pơkeăng pơlât, kế tơmeăm xúa tung khăm pơlât; mâu khu mơdró kâ Hàn Quốc pơtối tơdjuôm ivá, rơtế ƀă Việt Nam pêi pro mâu troăng hơlâ vâ ƀlêi trâng pơreăng ƀă ai hên tơdroăng ki rơkê plĕng, hbrâ rơnáu ‘mâi mơnhông tơdroăng ki tơdjâk dêi pơreăng, rak vế tơdroăng mơjiâng pro tê mơdró.

Katarina Nga tơplôu ƀă tơbleăng