VOV4.Sêdang - Kơxê lơ 30/9, pôa Phạm Minh Chính, Ngế pro xiâm hnê ngăn Chin phuh pêi cheăng ‘no tơdrêng ing troăng hyôh Internet ƀă Khu pơkuâ ngăn Đảng ủy Thừa Thiên Huế ‘na tơdroăng mơnhông cheăng kâ rêh ối pơlê pơla 9 khế hơnăm 2021 ƀă tơdroăng tơbleăng pêi pro pơkâ dêi Khu xiâm pơkuâ tơdroăng kal kí ‘na mơjiâng ƀă mơnhông kong pơlê Thừa Thiên Huế troh hơnăm 2030, hnoăng cheăng troh hơnăm 2045. Mơgêi rôh hôp, pôa Phạm Minh Chính tơmâng xo mâu tơdroăng ki hiăng pêi pro klêi dêi kong pơlê Thừa Thiên Huế tung hbrâ mơdât pơreăng COVID-19 ƀă mơnhông cheăng kâ rêh ối pơlê tung pơla hdrối kố nah, veăng kum tơƀrê, kal khât tung tơdroăng ki pêi klêi tơdjuôm dêi tơnêi têa pin.

Pơtối mơdêk séa ngăn, pêi klêi tơdroăng pơkâ, troăng pơkâ tơleăng tơvâ tơvân tung pêi cheăng kâ, pêi pro klêi mâu tơdroăng pơkâ tơleăng xơpá tơvâ tơvân ăm tơdroăng ki mơjiâng pro, tê mơdró; Mơdêk tơdroăng cheăng kâ tơtro ƀă hơ’lêh nếo túa pơkâ ƀă mơdêk ki rơkê plĕng tung tơdroăng ki xúa khoa hok kong ngê̆, hơ’lêh nếo rơkê plĕng, mơdêk tơdroăng rơkê tung pêi cheăng ƀă ki kal cho mâu kơvâ pêi cheăng kâ, tê mơdró vâ rĕng mơdêk kơnía tung tơnêi têa, mơdêk ivá tơxup tơbriâp dêi tơdroăng cheăng kâ tơtro ƀă pêi pro tơdâng tơ’mô, tơƀrê mâu tơdroăng cheăng tung la ngiâ.

Katarina Nga tơplôu ƀă tơbleăng