VOV4.Sêdang - Kơxo lơ 16/9, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa pơkuâ Hneăng hôp dêi Chin phuh ‘na tơdroăng mơjiâng ƀă pêi kêi đeăng tiô pơkâ. Hneăng hôp châ tơkŭm po tiô troăng mơ’no tơdrêng tung um tơvi tiô troăng măng Internet ing tíu pêi cheăng Chin phuh ƀă 63 kong pơlê, pơlê kong kơdrâm tung lâp tơnêi têa.

Hneăng hôp Chin phuh ‘na tơdroăng mơjiâng ƀă kêi đeăng pơkâ

Xông tơpui pơxiâm po hneăng hôp, pôa Phạm Minh Chính tối ăm ‘nâi, klêi kơ’nâi rah tŭm mâu kăn pêi cheăng tung Chin phuh hneăng hơnăm 2021 – 2026, Chin phuh, Ngế pro xiâm hnê ngăn Chin phuh  hiăng hnê mơhno mâu kơvâ cheăng, mâu râ lo pêi mơjiâng ƀă kêi đeăng pơkâ, tung mê pơcháu mơngế ối a ko pôu râng hnoăng cheăng hnê mơhno, séa ngăn, mơhnhôk tơdroăng mơjiâng, pêi kêi đeăng tiô pơkâ. Ngế pro xiâm hnê ngăn tơnêi têa pơkâ, mâu khu xiâm, kơvâ cheăng, kong pơlê mơdoh chôu vêh séa ngăn, hvái ngăn mâu tơdroăng ki lâi ối tơvâ, mâu tơdroăng ki lâi ki kal vâ tơbleăng.

Ngế pro xiâm hnê ngăn tơnêi têa tối nhên, kố cho tơdroăng ki kal, kal môi tuăn mơnhên, môi tuăn mơnhên tiô pơkâ xiâm, hnoăng cheăng, pơkâ, mơnhên tíu ki tá hâi tro, ti tăng xiâm kối, ki má lối cho xiâm kối ing tơná pin vâ ‘mâi rơnêu.

A Sa Ly tơplôu ƀă tơbleăng