VOV4.Sêdang - Hâi lơ 7/9, pôa Phạm Minh Chính, Ngế pro xiâm hnê ngăn tơnêi têa pơkuâ roh hôp mơ’no tơdrêng tung um tiô troăng măng dêi Chin phuh, mâu khu xiâm, kơvâ cheăng ki tơdjâk ƀă mâu kong pơlê, pơlê kong kơdrâm ai têa kơxĭ ‘na tơnăng ká xi xŏng ôh tá tro luât, ôh tá tối tơbleăng ƀă ôh tá tiô pơkâ. A roh hôp, mâu kong pơlê a kĭng têa kơxĭ hiăng tơbleăng Ngế pro xiâm hnê ngăn Chin phuh tơdroăng pêi pro hnê mơhno dêi kong pơlê tơná, tơdrêng amê, pơtroh troh Chin phuh, Ngế pro xiâm hnê ngăn Chin phuh mâu tơdroăng pâ thế ƀă xuân hiăng tơkêa ƀă Ngế pro xiâm hnê ngăn tơnêi têa khŏm ôh tá ăm ai tơdroăng kố.

Mơgêi a roh hôp, Ngế pro xiâm hnê ngăn tơnêi têa tối nhên tiô troăng pêi ton xŏn mơnhông mơdêk ká xi xŏng Việt Nam, troh nôkố 2030, kơxô̆ ká xi xŏng châ 10 rơtuh tâ̆n ƀă pêi lo liăn tê ká xi xŏng ngi kong têa ê châ dâng 14 troh 16 rơtal dollars. Tơdroăng ki ai mâ ƀă tơdroăng pêi cheăng dêi kuăn pơlê tơnăng ká xi xŏng a mâu kơpong têa kơxĭ hiăng tăng cheăng pêi ăm dâng 1 rơtuh ngế kuăn pơlê tơnăng ká xi xŏng ƀă 4 rơtuh ngế ki tơdjâk; kum mơnhông mơdêk kơvâ ká xi xŏng, mơdêk tơdroăng rêh ối kuăn pơlê, mơnhông mơdêk cheăng kâ – rêh ối tơnêi têa, kum kal khât tung kring vế tơniăn pơlê pơla, hnoăng pơkuâ têa kơxĭ rơlố dêi Tơnêi têa.

A Sa Ly tơplôu ƀă tơbleăng