VOV4.Sêdang - Hdrối mê, pôa Phạm Minh Chính, Ngế pro xiâm hnê ngăn Chin phuh hiăng trâm mâ mâu ƀok thái pơkeăng, mâu ngế hriăn plĕng khăm pơlât Pơhlăng – Việt Nam. Xông tơpui a roh trâm mâ, pôa Phạm Minh Chính tối ăm ‘nâi, pơla kố nah roh pơreăng má 4, ƀă pơreăng virus Delta, pơreăng COVID-19 hiăng xông tâ tú ó tung lâp plâi tơnêi, tung mê ai Việt Nam tơdjâk kân troh tŭm tơdroăng rêh ối – pơlê pơla. Laga ƀă tơdroăng mơ-eăm, tơrŭm môi tuăn, môi hiâm mơno dêi lâp tơnêi têa ƀă tơdroăng veăng kum dêi pú hmâ lâp plâi tơnêi tung mê ai Pơhlăng, pơreăng COVID-19 hiăng châ mơdât.

Việt Nam pêi pro troăng pêi ton xŏn kâi trâng tơniăn, ƀeăn ƀĕng rơkê, mơdât châ tơƀrê pơreăng; lôu péa chôa ‘lâng  pro tơniăn, mơnhông cheăng kâ – rêh ối pơlê pơla. Ngế pro xiâm hnê ngăn tơnêi têa pói vâ mâu ƀok thái pơkeăng, mâu ngế hriăn plĕng khăm pơlât kong têa Pơhlăng – Việt Nam pơtối tŏng kum Việt Nam ôh tá xê to hbrâ, mơdât pơreăng COVID-19 nôkố mê tŏng kum Việt Nam tung tâi tâng kơvâ cheăng, ki má lối cho hbrâ tung khăm pơlât, khăm pơlât trâu hơngế, mơnhông kơvâ pro pơkeăng xua pơkâ pêi pơtối djâ hơniâp lĕm, phâi hơtô ăm kuăn pơlê.

A Sa Ly tơplôu ƀă tơbleăng