VOV4.Sêdang - Kơxê lơ 2/11, tiô chôu kong têa kong têa Ăng-glê, tung Hneăng hôp roh má 26 rêm pâ veăng Tơkêa dêi Khu lâp kong têa ‘na kong prâi hơ’lêh dó inâi COP26 tơkŭm po a kong têa Ăng-glê, pôa Phạm Minh Chính, Ngế pro xiâm hnê ngăn tơnêi têa veăng ƀă xông tơpui a hneăng hôp tơbleăng tơkêa kơdroh mơ’no metal lâp plâi tơnêi xua pôa Joe Biden, Kăn xiâm pơkuâ kong têa Mih ƀă Kăn hnê ngăn Vi ƀan châu Âu pơkuâ.

 Ngế pro xiâm hnê ngăn tơnêi têa veăng ƀă xông tơpui a roh leh tơbleăng tơkêa mơ’no metal lâp plâi tơnêi

Xông tơpui a leh tơbleăng kố, pôa Phạm Minh Chính tối mơnê ƀă kheăn kơdeăn tơdroăng khu tơkŭm po, Kăn xiâm pơkuâ kong têa Mih ƀă Kăn xiâm hnê ngăn Vi ƀan châu Âu hiăng krếo veăng troăng tơmiât rơkê tơkêa kơdroh mơ’no hyôh metal.

A hneăng hôp kal kố, pôa Phạm Minh Chính pơtroh 2 tơdroăng pơtâng tối. Ngế pro xiâm hnê ngăn tơnêi têa krếo thế tâi tâng pin tơrŭm môi tuăn, tơdjuôm ivá mơdât, pro kơdroh tơdroăng ki tâk dêi trếo metal. Ngế pro xiâm hnê ngăn tơnêi têa mơnhên, kố cho tơdroăng lâp plâi tơnêi xua mê thế ai troăng pêi pro dêi lâp plâi tơnêi; cho tơdroăng tơdjâk troh rêm ngế kuăn pơlê xua mê thế ai troăng veăng pêi pro tâi tâng kuăn pơlê.

A Sa Ly tơplôu ƀă tơbleăng