VOV4.Sêdang - Hdrối mê, tung kơxê hâi lơ 28/10/2021, pôa Phạm Minh Chính, Ngế pro xiâm hnê ngăn Chin phuh hiăng pơkuâ djâ khu kăn Việt Nam veăng hôp ‘no tơdrêng ing troăng hyôh internet Rôh hôp khu kăn xiâm ASEAN – Rusi rôh má 4 tơbâ 30 hơnăm mơjiâng tơrŭm cheăng ASEAN – Rusi. Kăn pơkuâ mâu kong têa ASEAN, pôa Vladimir Putin, kăn xiâm pơkuâ kong têa Rusi prếi kăn xiâm chêh tơm xo rokong ASEAN rơtế veăng hôp a Rôh hôp kố.

Mâu kăn pơkuâ tối nhên, ki pơxúa dêi tơbâ 30 hơnăm ASEAN – Rusi, phiu ro mâu tơdroăng ki hlo hơ’lêh tung tơrŭm cheăng la ngiâ pơla ASEAN – Rusi ƀă tơbleăng túa pơkâ pêi pro tung tâi tâng hneăng hơnăm 2021 – 2025. ASEAN – Rusi tối nhên tơrŭm cheăng krá tơniăn vâ hbrâ mơdât pơreăng COVID-19, tơrŭm tung mâu ivá mơ-eăm xoăng vaccine tơniăn, tơƀrê ƀă tơdâng tơ’mô troh kuăn pơlê tung kơpong.

Péa pâ môi tuăn tơrŭm cheăng, tơpui kâ, tối tơbleăng ăm dêi rơpó mâu tơdroăng ki vâ hbrâ ví ƀă tơdroăng kring vế, veăng kum tung tơdroăng ki hơniâp lĕm, gak kring ƀă tơniăn dêi kơpong, môi tiah tí tăng ‘nâi plĕng ‘na mâu tơdroăng gak kring, ƀă tơpui kâ ASEAN – Rusi ‘na mâu tơdroăng gak kring tung kong ngĕ thong tin. Mâu kong têa môi tuăn hơnăm 2022 cho Hơnăm Tơrŭm Khoa hok – kih thuâ̆t ƀă kơmăi kơmok ASEAN – Rusi, tơhrâ kô tơrŭm rơtế mơdêk tê mơdró, ‘no liăn cheăng, ‘mâi mơnhông cheăng kâ ƀă tơniăn mâu tơdroăng ki tŏng kum, mơdêk tơrŭm pơla Khu tơrŭm cheăng kâ châu Á, châu Âu (EAEU) ƀă ASEAN.

Nga tơplôu ƀă tơbleăng