VOV4.Sêdang - Xuân tung kơxê lơ 26/10, pôa Phạm Minh Chính, Ngế pro xiâm hnê ngăn Chin phuh veăng hôp ƀă tơpui a Rôh hôp khu kăn xiâm ASEAN – Sinuâ rôh má 24. Tơpui a rôh po hôp, pôa Phạm Minh Chính tối nhên, ƀă tơdroăng ki hiăng hbrâ kơchăng dêi 30 hơnăm tơrŭm cheăng, 25 hơnăm tơrŭm cheăng tơpui kâ, ƀă tơrŭm cheăng tung la ngiâ, ASEAN prếi Sinuâ hiăng mơjiâng pro chiâng tơdroăng ki tơrŭm cheăng tung tâi tâng, hên túa ƀă ai pơxúa tung mâu kơvâ cheăng.

Châ tơdroăng kố cho kơnôm ing mơ-eăm ƀă tơhrâ rơdêi dêi péa pâ rơtế ƀă dêi rơpó tơbêng tơrŭm cheăng tung tơdroăng ki loi tơngah, hlê plĕng ƀă loi nhuô̆m dêi rơpó, tơrŭm rơtế ai pơxúa. Ngế pro xiâm hnê ngăn tơnêi têa phiu ro ƀă rơhêng vâ Sinuâ, ƀă tơdroăng ki hiăng ai hlâu cho hnoăng cheăng dêi tơná, pơtối veăng tơrŭm tung kơpong ƀă a kong têa ê tung hbrâ mơdât pơreăng, rak vế tơdroăng ki hơniâp lĕm, tơniăn, mơdêk ‘mâi mơnhông ƀă mơdêk cheăng kâ krá tơniăn.

Katarina Nga tơplôu ƀă tơbleăng