VOV4.Sêdang - Kơxo lơ  27/10 hiăng po hneăng hôp mâu kăn xiâm ASEAN - Nhuk roh má 24, pôa Phạm Minh Chính, Ngế pro xiâm hnê ngăn Chin phuh pơkuâ djâ khu kăn Việt Nam veăng hôp rơtế ƀă mâu kăn xiâm kong têa tung ASEAN, pôa  Kishida Fumio, Ngế pro xiâm hnê ngăn kong têa Nhuk ƀă Kăn xiâm chêh tôm xo rơkong ASEAN. Tơpui a hneăng hôp, pôa Phạm Minh Chính, Ngế pro xiâm hnê ngăn tơnêi têa tối, Việt Nam kô pơtối veăng ‘no hnoăng hên, mơnhông tơrŭm cheăng pơla péa pâ rế tơrŭm trâu tâ, tơ-ƀrê tâ ƀă ai pơxuá.

Ngế pro xiâm hnê ngăn tơnêi têa veăng hôp mâu kăn xiâm ASEAN - Nhuk roh má 24

Ngế pro xiâm hnê ngăn tơnêi têa tối nhên péa pâ kal tơrŭm krá ƀă dêi rơpó tung ‘mâi mơnhông ƀă rak tơniăn mâu tơdroăng ki hiăng pơtê xua pơreăng COVID-19, pro tơ’lêi hlâu ƀă kum khât dêi rơpó vâ mâu khu mơdró, khu ‘no liăn cheăng dêi Nhuk pơtối châ tơniăn tung pêi pro tê mơdró a kơpong ƀă Việt Nam.

Pakĭng mê, Ngế pro xiâm hnê ngăn tơnêi têa xuân pâ thế Nhuk veăng kum ASEAN pơtối veăng kum kơdroh ki kơtăn ‘na mơnhông mơdêk, ƀă mơnhông mơdêk tơdâng tơ’mô, tá tơdroăng pêi krá tơniăn a mâu kơpong, rêm tíu ki hâi mơnhông, tung mê ai tá kơpong Mekong ing rôh tơrŭm Mekong - Nhuk.

Gương tơplôu ƀă tơbleăng