VOV4.XơĐăng - Kơxê lơ 28/12, pôa Lê Văn Thành, Ngế pro xiâm phŏ hnê ngăn tơnêi têa hiăng lăm séa ngăn tơnêi tíu ƀă pêi cheăng ƀă kong pơlê Lâm Đồng rơtế mâu khu xiâm, kơvâ cheăng ki ai tơdjâk troh ‘na tơdroăng ki hbrâ vâ ‘no liăn pro troăng prôk Tân Phú (Đồng Nai) – Bảo Lộc (Lâm Đồng) ƀă Bảo Lộc – Liên Khương. Tơdroăng tơkêa pro troăng prôk Tân Phú – Bảo Lộc kố xŏn ai 66km, tung mê 11km ối tung kong pơlê Lâm Đồng.

Ngế pro xiâm phŏ hnê ngăn tơnêi têa: Rơtế pôu râng tơdroăng cheăng vâ rĕng pơxiâm pro troăng prôk Dầu Giây – Liên Khương

Kố cho môi tung tung 3 tơdroăng tơkêa dêi tơdroăng Tơkêa pro troăng prôk Dầu Giây - Liên Khương. Tơdroăng tơkêa kố châ xoăng liăn ‘no mơjiâng 2 hneăng, tiô tối hdrối kô klêi ƀă ăm xúa a hơnăm 2025. Tơpui a rôh pêi cheăng, pôa Lê Văn Thành, Ngế pro xiâm phŏ hnê ngăn Chin phuh mơnhên tối khât tơdroăng ki kong pơlê Lâm Đồng hiăng hbrâ rơnáu châ kơxô̆ liăn pơlê pơla sap ing mâu khu mơdró kâ ƀă môi iâ liăn dêi kong pơlê, ôh tá xúa liăn Tơnêi têa drêng mơjiâng pro lối 140km troăng kân.

Tơdrêng amê hlối pơkâ thế mâu khu xiâm, kơvâ cheăng ki ai tơdjâk tơkŭm tŏng kum kong pơlê pơkâ tơleăng mâu tơdroăng ki xơpá, pêi klêi mâu hlá mơ-éa tiô pơkâ vâ rĕng mơjiâng pro, ăm xúa mâu troăng kân tro tiô pơkâ.

Katarina Nga tơplôu ƀă tơbleăn