VOV4.XơĐang - Ngế tâ pơreăng ki hơ’lêh tơ-ê Omicron apoăng a Việt Nam hiăng châ ‘nâi a tơnêi têa pin. Tơdroăng kố châ khu séa ngăn pơreăng tâ tú Việt Nam tối tơbleăng dêi Hngêi pơkeăng Trung ương Quân đội 108 tơbleăng ăm Khu xiâm ngăn pơkeăng. Hâi lơ 19/12/2021, Hngêi pơkeăng Trung ương Quân đội 108 tơdah xo môi ngế tơmối kơto tung tơƀai kơneăng QH9028 sap ing Ănglê vêh ngi Việt Nam. Test a tơraih tơƀai yương tĭnh ƀă SARS-CoV-2.

‘Na pơreăng dêi ngế ki tâ pơreăng kố cho tơmối vêh ing kong têa Ănglê, hâi lơ 20/12/2021, Hngêi pơkeăng hiăng pơtối pêi pro ƀô̆ gene SARS-CoV-2 ki tâ a ngế ki kố ƀă túa ki nếo, klêi mê nhôm túa pơreăng ki hơ’lêh phá tơ-ê Omicron. Kố cho ngế ki tâ Omicron apoăng châ ‘nâi a Việt Nam, cho ngế ki ing kong têa ê mot tung tơnêi têa hiăng châ klâ ăm ối krê, rak ngăn teăm tơdrêng klêi kơ’nâi mot tung tơnêi têa.

Khu xiâm ngăn pơkeăng ƀă khăm pơlât ăm ‘nâi dế pơtối séa ngăn kơtăng pơreăng COVID-19 tối tơdjuôm ƀă tơdroăng ki mơni tâ tú tú pơreăng ki nếo Omicron tối krê. Tơdrêng amê hlối hnê tối kuăn pơlê pêi pro kơtăng mâu troăng hơlâ hbrâ mơdât pơreăng COVID-19 ƀă pâk tŭm vaccine.

Katarina Nga tơplôu ƀă tơbleăng