VOV4.Xơ Đăng - Kơxo lơ 11/11, Tiô tơdroăng hneăng hôp, klêi kơ’nâi mơgêi tơdroăng ối tung kơvâ pêi cheăng, mô đô̆i rong râ ƀă rêh ối pơlê pơla a Hneăng hôp má 2 Kuô̆k hô̆i pơtối tơdroăng xiâm kơ-êng ƀă tiâ rơkong kơ-êng ƀă Ngế xiâm pơkuâ hnê hriâm ƀă hnê mơjiâng tuăn ngôa rơkê. Mâu tơdroăng xiâm ki mâu kăn teăng mâ Kuô̆k hô̆i rơhêng vâ ‘nâi plĕng, kơ-êng ƀă pôa Nguyễn Kim Sơn, Ngế xiâm pơkuâ hnê hriâm ƀă Hnê mơjiâng tuăn ngôa rơkê tơkŭm a mâu tơdroăng ki pơlê pơla dế rơhêng vâ ‘nâi plĕng nôkố mê cho: tơdroăng hnê ƀă hriâm tơdrêng tung um tơvi, tơdroăng ki hôm tung rah chêh kơxop mơ-éa tiô tơdroăng hnê hriâm phôh thong nếo, hnê tơ’nôm, hriâm tơ’nôm online.

Tiâ rơkong ‘na tơdroăng kố, pôa Nguyễn Kim Sơn tối ăm ‘nâi, tơdroăng hnê ƀă hriâm mơ’no tơdrêng tung um tiô troăng măng internet môi tiah nôkố tá hâi chói ai xua mê trâm hên pá puât. Tiô xêo ngăn ôh tá xê cho 1,5 rơtuh ngế hok tro ôh tá ai tơmeăm hriâm tâp mê ki nhên cho ai lối 1,8 rơtuh hok tro nôkố ôh tá ai ki klâi tung châ vâ hriâm mơ’no tơdrêng tung um tiô troăng măng internet.

Mơhé tiah mê, kơvâ Hnê hriâm hriâm ƀă hnê mơjiâng tuăn ngôa rơkê dế mơ-eăm vâ tơniăn tung hnê ƀă hriâm tơdâng tơ’mô pơla mâu troăng hriâm. Pôa Nguyễn Kim Sơn tơmâng xo rơkong tơpui dêi mâu kăn teăng mâ ƀă tơkêa kô ai hnê mơhno nhên tung la ngiâ.

A Sa Ly tơplôu ƀă tơbleăng