VOV4.Xơ Đăng - Kơxê lơ 12/11, Khu kăn ki pêi dêi hnoăng cheăng dêi Khu xiâm ngăn pơkeăng ƀă khăm pơlât xua pôa Nguyễn Trường Sơn pro kăn pơkuâ khu kăn kố ai hiăng ai rôh pêi cheăng ƀă Khu hnê mơhno cheăng hbrâ mơdât pơreăng COVID-19 dêi kong pơlê Dak Lak ‘na hnoăng cheăng tơdah xo, pơlât mâu ngế ki tâ pơreăng.

Sap ing hâi lơ 27/1 troh nôkố Dak Lak hiăng ai 5 rơpâu 872 ngế tâ COVID-19. Tung 14 hâi achê kố, Dak Lak ai 2.074 ngế tâ COVID-19. Tung mê ai 1.429 ngế tâ tung kuăn pơlê, châ 68,9% kơxô̆ ngế tâ ki hiăng châ ‘nâi. Ƀă hnoăng cheăng mơjiâng tôh tơkŭm tơdah xo pơlât: lâp kong pơlê hiăng mơjiâng 6 to tíu pơlât ăm mâu ngế ki tâ COVID-19 ƀă túa pơlât ai 3.222 to xoăng pơlât tiô túa ki pro 3 râ.

Pôa Nguyễn Trường Sơn, ngế xiâm phŏ ngăn pơkeăng ƀă khăm pơlât tơpui mơgêi a rôh pêi cheăng

Hlo tơdroăng ki ôh tá tơniăn dêi pơreăng tâ tú, kong pơlê kô mơdêk tơ’nôm kơxô̆ xoăng pơlât ăm mâu ngế ki tâ pơreăng COVID-19 tâk troh 5.580 to xoăng tung tâi tâng mâu râ. Vâ chiâng pêi pro tơdroăng ki rơhêng vâ hbrâ mơdât pơreăng COVID-19, a rôh pêi cheăng, Dak Lak pơkâ mơ’no mâu khu xiâm, kơvâ cheăng, malối cho Khu xiâm ngăn pơkeăng ƀă khăm pơlât tŏng kum kế tơmeăm ƀă pơtroh mâu ngế cheăng sap ing mâu kong pơlê vâ kum Dak Lak tung pơlât mâu ngế ki tâ pơreăng COVID-19; Kum tơ’nôm vaccine ăm kong pơlê vâ tơkŭm pâk ăm tâi tâng mâu ngế ki sap ing 18 hơnăm tơngi klêng, kuăn pơlê sap ing mâu kơpong ki ai pơreăng vêh ƀă vâi hdrêng sap ing 12 troh 18 hơnăm; kum ‘no liăn mơjiâng pro, pơkuâ 1 Hngêi pơkeăng ki pro pơtân a râ má 3 vâ pơlât mâu ngế tâ, râ tung tơdroăng ki tơkâ luâ ‘na tơdroăng pơlât ăm mâu ngế ki tâ COVID-19 dêi kong pơlê.

Katarina Nga tơplôu ƀă tơbleăng