VOV4.Sêdang - Kơxê lơ 23/9, a tíu pêi cheăng Khu xiâm tơpui kâ, pôa Phạm Quang Hiệu, ngế xiâm phŏ tơpui kâ hiăng châ hlo Leh tơdah xo liăn tŏng kum kơnâ 300 rơpâu dollars xua Kăn teăng mâ Oman a Hà Nội kum, teăng mâ Chin phuh ƀă kuăn pơlê kong têa Oman, diâp ăm kăn teăng mâ Vi ƀan xiâm Măt trâ̆n Tơnêi têa Việt Nam kum kuăn pơlê a mâu kong pơlê peăng Tơdế tơnêi têa Việt Nam xua tro tơdjâk xua kong mê khía mơhot têa kân lân lu tung pơla hdrối kố nah.

Tơpui a rôh leh, Teăng mâ Măt trâ̆n Tơnêi têa Việt Nam mơnê tơdroăng ki tŏng kum ai pơxúa dêi Chin phuh ƀă kuăn pơlê kong têa Oman, ăm ‘nâi kô rĕng ‘mot tơ’nôm kơxô̆ liăn tŏng kum ăm mâu kong pơlê vâ kum mơjiâng pro hngêi ối ăm mâu rơpŏng ki tro tơ’nhiê hngêi ối a kơpong ki tro têa lân lu vâ rĕng tơniăn tung rêh ối ăm kuăn pơlê a tíu kố.

Katarina Nga tơplôu ƀă tơbleăng