VOV4.Sêdang - Tung pơla hên tơdroăng tơkêa bro on tơhrik kơtâu ƀă khiá a Tây Nguyên trâm hên xahpá tung tơdroăng ki chêl thiĕn, tơdroăng ki pro tơbăng mâu tíu tơníu, ai hên tơdroăng ki tơbriât ƀă pro ôh tá tơniăn ‘na rêh ôí, mê a tơring Ea Hleo, kong pơlê Dak Lak hiăng pêi pro klêi chiâng ƀă mâu tơdroăng ki djâ troăng ahdrối. Ki kơnâ git dêi tơdroăng pêi cheăng kâ dêi mâu tơdroăng tơkêa bro kố rơtế pêi pro tơdrêng ƀă tơdroăng ki ai pơxúa pơlê pơla; tơdrăng lĕm, tơmâng ngăn, pêi pro tiô luât pơkâ, mê cho ki xiâm vâ mâu khu ngê ki ‘no liăn, khu kăn pơkuâ hnê ngăn ƀă kuăn pơlê châ vâ môi tuăn, kum tơdroăng tơkêa bro kố pro pơxúa kân khât ăm tơdroăng pêi cheăng kâ - rêh ối pơlê pơla, ing mê, cho pro ki xiâm vâ kum thăm rế hlê plĕng pơtối tơ’mot hên khu râ, kơvâ cheăng mơ’no liăn vâ mơjiâng pro on tơhrik kơtâu ƀă khiá a mâu hâi la ngiâ, pơtối mơdêk ki ai hlâu dêi pơlê cheăm, tơring, kong pơlê.

Hngêi ki nếo pro rơdâ 100 met karê dêi rơpŏng nâ Phan Thị Hồng Phượng a thôn 5, cheăm Dliê Yang, tơring Ea Hleo, kơtăn ing mâu trăng on tơhrik khía dêi Tơdroăng tơkêa Phong Điện Tây Nguyên bu to hrĭng met. Toăng hngêi kố xuân ối môi ngế xêh a ngo ki hdrối nah, la kơnôm ing tơdroăng tơkêa on tơhrik khía mơjiâng pro troăng tơkâ luâ mê chiâng kơnía. On veăng nâ Phượng hiăng xúa ki pơxúa nếo vâ po kuăn tê tơmeăm, pêt tơ’nôm hên reăng tâ tá kơdrum ƀă ‘na ngiâ hngêi vâ kum ăm tơdroăng ki tơmối lăm troh ‘’check-in’’ tơnêi tơníu on tơhrik.

“Sap ing hâi ki mơjiâng pro tơdroăng hiăng klêi, kuăn pơlê tung thôn 5 châ pơxúa xua ai troăng ƀê tong prôk lăm. Tá hâi tối, hdrối nah akố ôh tá ai kuăn mơngế lăm troh la nôkố tơmối troh akố hên. Vâi troh ngăn mâu tơnêi tơníu, xup um a mâu trăng on tơhrik ƀă tơnêi tơníu ki lĕm akố. Tơdroăng rêh ối hiăng hơ’lêh hên, kơnôm ai tơdroăng tơkêa on tơhrik khía kố’’.

Mâu tơdroăng tơkêa on tơhrik khía kô pro pơxúa ăm kơxô̆ liăn châ xo ăm liăn ngân tơnêi têa

Tơdroăng tơkêa Phong Điện Tây Nguyên a cheăm Dliê Yang, tơring Ea Hleo, cho tơdroăng tơkêa on tơhrik khía ki apoăng a Dak Lak ƀă tá kơpong Tây Nguyên, xua grup pơkuâ HBRE tơbleăng sap ing hơnăm 2017. Pôa Nguyễn Hoàng Hiệp, kăn phŏ pơkuâ tơdroăng tơkêa kố ăm ‘nâi, tơdroăng tơkêa kố ai ki têi 28,8 MW, tung mê ai 12 to trăng turbin, tơdjâk troh tơdroăng ki xo tâi tâng tơnêi tơníu kế tơmeăm dêi 84 rơpŏng kuăn pơlê.

Kố cho tơdroăng ki trâm hên xơpá. 84 rơpŏng cho 84 túa tơmiât phá dêi rơpó. Tâng ôh tá pơkâ tơleăng tơxâng kô ai tơdroăng ki pơsăm tối, pơsăm tơkêng, pro pá ƀă tơdroăng. Ƀă tơdroăng ki rơtế dêi rêm râ pơkuâ ƀă tơdroăng ki chiu tơkôm, hiâm mơni dêi khu mơdró, mâu tíu ki xơpá ‘na tơnêi tíu hiăng châ pơkâ tơleăng. Tơdroăng tơkêa hiăng châ mơjiâng pro ƀlêi chiâng ƀă mơ’no on tơhrik a khế 11 hơnăm 2019. Pôa Hiệp tối:

“Vi ƀan hnê ngăn tơring mơjiâng Khu tŏng kum pơkâ tơleăng tơnêi tíu ƀă tơdroăng tŏng kum kum khu mơdró kâ. Tung pơla tơkŭm pro, khu mơdró kâ tơrŭm ƀă Tíu xiâm Rak xúa tơnêi dêi kong pơlê, tơring hiăng pơkâ túa chêl thiê̆n tơnêi tơníu. Tâi tâng kơxô̆ liăn chêl thiê̆n châ pơkâ nhên, tơbleăng tơdrăng. Vi ƀan hnê ngăn mâu cheăm séa ngăn tung tâi tâng kơxô̆ rơpŏng kơtiê châ xo liăn chêl thiê̆n, ƀăng tơnêi ƀă kế tơmeăm a tơnêi kố gá ai to lâi mê pơtroh ăm khu râ ki ai hnoăng pơkuâ kĭ pơkâ klêi mê séa ngăn ki ai khât ‘no mơdrếo liăn chêl thiê̆n xo tơnêi ăm kuăn pơlê’’.

Klêi kơ’nâi ƀlêi chiâng dêi Tơdroăng tơkêa Phong Điện Tây Nguyên, Ea Hleo pơtối tơbleăng môi tơdroăng tơkêa ki ê, tâp 14 hdroh tơdroăng ki apoăng. Mê cho tơdroăng tơkêa Hngêi kơmăi on tơhrik khía Ea Nam, xua Grup pơkuâ Trung Nam ‘no liăn cheăng.

Tiô pôa Nguyễn Văn Hà, kăn hnê ngăn Vi ƀan tơring Ea Hleo, pơloăng mơnúa ƀă tơdroăng tơkêa ki nếo cho kân khât xua athế pơkâ tơleăng mâu tơdroăng cheăng tung pơla bu lối 11 khế, mê nếo po tung pơla ai pơreăng COVID-19 tâ tú rơ-iêo. Tung mâu tơdroăng xơpá trâm hên hĭn, malối cho ‘na tơdroăng ki chêl thiê̆n ‘na tơdroăng ki xo tơnêi tơníuƀă tơdroăng xơpá ‘na mơjiâng pro, khu ki ‘no liăn cheăng ai drêng ‘nâ hiăng pêi pro phá tơ-ê, rơhêng vâ lăm roê tơdrêng hlối dêi dêi kuăn pơlê môi tiah dế hlo hên h^n a mâu tơdroăng tơkêa on tơhrik khía ki ê.

Tơdroăng tơkêa on tơhrik Tây Nguyên cho tơdroăng tơkêa ki tơrŭm pơla on tơhrik tơnêi têa ki apoăng a Tây Nguyên

Kơnôm ing tơdroăng hbrâ rơnáu, kơhnâ dêi rêm râ pơkuâ, khu pú hên, khu râ hiăng kum khu mơdró kâ pơkâ tơleăng tơdroăng ki xơpá. Kố cho tơdroăng ki hên tơdroăng tơkêa ki ê trâm, nôkố dế xơpá tung tơdroăng ki pơkâ tơleăng vâ pro tơniăn.

Pôa Nguyễn Văn Hà tối, nôkố hiăng ƀlêi chiâng, kal khu ki ‘no liăn cheăng athế tơdrăng, khu kăn pơkuâ tối rơtế ƀă pêi, pơkâ kơtăng tơdrăng, pêi pro tiô tơdroăng tơhrâ. Ƀă tơring Ea Hleo, mê cho ivá vâ pơtối tơ’mot, tơbleăng mâu tơdroăng tơkêa ki ê, pêi pro troh mơdêk ki ai hlâu on tơhrik 3.000MW dêi tơring.

‘’Hneăng ki apoăng, hên kuăn pơlê tơtrâ khât, vâi ôh tá vâ tơrŭm. Ngin ngah mâu mêh krâ pơlê, kăn pơkuâ thôn pơlê, kăn pơkuâ chi ƀô̆, lơ ngế ki châ kuăn pơlê loi nhuô̆m tơrŭm rơtế ƀă kăn ƀô̆ cheăm, kăn pơkuâ tơring veăng tơpui tối, tơbleăng nhên ăm kuăn pơlê mê vâi hiăng môi tuăn, hía troăng hơlâ pơkâ ki kân dêi kong pơlê, tơring. Drêng tơpui tối klêi, kuăn pơlê hlê ƀă hâk vâ ƀă tơdroăng pơkâ.

A tơring Ea Hleo sap ing hdrối nah troh nôkố tá hâi ai tơdroăng ki ôh tá môi tuăn pơla kuăn pơlê ƀă khu mơdró kâ ‘no liăn mơjiâng pro on tơhrik khía. Mê cho tơdroăng mơeăm khât dêi ngin, ki kố hiăng veăng kum tung tơdroăng tơƀrê dêi mâu tơdroăng tơkêa on tơhrik a tơring’’.

Hâi kố, Ea Hleo hiăng mơhno nhên ivá dêi tíu ki ai on tơhrik khía a kơpong Tây Nguyên ƀă vâ chê 100 to trăng, mơ’no dâng 1 rơtal 300 rơtuh KWh on tơhrik rêm hơnăm. Rơtế ƀă tơdroăng ki veăng kum lối hrĭng rơtal liăn rêm hơnăm ăm liăn ngân tơring, ‘no tơ’nôm on tơhrik ăm lâp tơnêi têa, mê mâu tơdroăng tơkêa ki u ối lối 60 km troăng ƀê tong kum ăm mâu tơdroăng tơkêa on tơhrik khía a Ea Hleo cho kơ’nôm ing ivá rơdêi, pôu râng hnoăng, đi đo tối rơtế ƀă pêi, rak tơniăn pơla hnoăng pôu râng ƀă ki pơxúa dêi tâi tâng rêm pâ.

VOV Tây Nguyên

Katarina Nga tơplôu ƀă tơbleăng