VOV4.Sêdang - Tối nhên a rôh hôp tơbleăng hneăng má 3 ƀă tơbleăng ‘na túa pơkâ mơdêk mơjiâng pro tê mơdró mâu khế mơ’nui hơnăm 2021 ƀă troăng hơlâ pơkâ hơnăm 2022 po a kơxo lơ 5/10 a Hà Nội, pôa Phùng Đức Tiến, kăn phŏ ngăn pêi chiâk deăng ƀă Mơnhông thôn pơlê ăm ‘nâi, păn mơnăn mơnoâ ƀă ká xi xŏng kô cho 2 kơvâ cheăng ki ối rơlối vâ kơvâ pêi chiâk deăng rak vế mơdêk tung hơnăm kố. 9 khế hdrối kố nah kơvâ pêi chiâk deăng pơtối tối nhên cho tíu xiâm dêi cheăng kâ, rak vế ivá mơdêk 2,74%, kơxô̆ liăn pêi ing tê ká xi xŏng ngi kong têa ê tiô riân châ 35,5% rơtal dollars Mih, tâk 17,7%.

Vâ rak tơniăn tê tơmeăm ăm mâu khế mơ’nui hơnăm, malối cho Têt lo hơnăm nếo Nhâm Dần 2022 ƀă tê ngi kong têa ê, kơvâ pêi chiâk deăng hiăng mơnhên 4 khu troăng hơlâ. Tiah mê, tơkŭm hnê mơhno mơjiâng pro, tê mơdró tơtro ƀă kong prâi, tơdroăng ki pơreăng COVID-19 tâ tú a rêmkong pơlê, pơlê kong kân; pơkâ tơleăng mâu tơdroăng ki xơpá mơdêk rơdêi mâu tơdroăng pơkâ tê mơdró ƀă kong têa ê pro tơ’lêi hlâu ăm tơdroăng ki tê tung tơnêi têa ƀă mơdêk tê mơdró ngi kong têa ê. Tơdrêng amê hnối mơdêk mâu troăng hơlâ hbrâ mơdât pơreăng, hbrâ ví kong mê khía mơhot têa kân lân lu châ tơƀrê.

Katarina Nga  tơplôu ƀă tơbleăng